ក្លឹប​ធំៗ 3 កំពុង​ចាប់​អារម្មណ៍​លើ​ខ្សែបម្រើ Rodrigo Bentancur

ក្លឹប​ហ្សងក្រហម Liverpool, Real Madrid និង Manchester United ត្រូវ​បាន​គេ​រាយការណ៍​ថា កំពុង​ចាប់​អារម្មណ៍​ក្នុង​ការ​ចុះ​ហត្ថលេខា​លើ​ខ្សែបម្រើ Rodrigo Bentancur ដែល​បច្ចុប្បន្ន​ជា​កីឡាករ​របស់​ក្លឹប​មាន់ខ្នាយមាស Tottenham Hotspur។

យ៉ាង​ណា​មិញ​កីឡាករ​សញ្ជាតិ​អ៊ុយរូហ្គាយ​រូប​នេះ​បាន​មក​ដល់​ទីក្រុងឡុងដ៍​ខាង​ជើង ដោយ​ផ្ទេរ​ពី​ក្លឹប​សេះបង្កង់ Juventus ក្នុង​កំឡុង​ទីផ្សារដោះដូរ​កីឡាករ​ខែ​មករា​ដើម​ឆ្នាំ​នេះ។ ភ្លាមៗ​នោះ​ខ្សែបម្រើ​រូប​នេះ​បាន​ក្លាយ​ជា​កីឡាករ​ដ៏​សំខាន់​របស់​ក្លឹប Tottenham Hotspur និង​តែងតែ​ជា​ជម្រើស 11 នាក់​ដំបូង​ក្រោម​ការ​ដឹកនាំ​របស់​លោក Antonio Conte។

Rodrigo Bentancur បាន​ចាប់​ដៃគូ​គ្នា​លេង​បាន​យ៉ាង​ល្អ​ជាមួយ​ខ្សែបម្រើ Emile Hojbjerg ក្នុង​ពាក់​កណ្តាល​រដូវកាល​ដំបូង​របស់​គាត់​នៅ​ទឹកដី​អង់គ្លេស ហើយ​បាន​ដើរ​តួយ៉ាង​សំខាន់​ក្នុង​ការ​ប្រកួត​ជម្រុះ​នៅ UEFA Champions League របស់​ក្លឹប Tottenham Hotspur ផង​ដែរ។

ដោយ​ឡែក​កីឡាករ​វ័យ 25 ឆ្នាំ​រូបនេះ​ស្ថិត​នៅ​ក្រោម​កុងត្រា​របស់​ក្លឹប​បច្ចុប្បន្ន Tottenham Hotspur រហូត​ដល់​ចុង​បញ្ចប់​នៃ​រដូវកាល​ឆ្នាំ 2025-2026 ប៉ុន្តែ​ក្រុម​ធំៗ​ជា​ច្រើន​ត្រូវ​បាន​គេ​ជឿថា បាន​នឹង​កំពុង​តាមដាន​ពី​ការវិវត្តន៍​នៃ​ទម្រង់​លេង​ដ៏​ល្អ​របស់​ខ្សែ​បម្រើ​ឆ្នើម​រូប​នេះ។ យោងតាម​របាយការណ៍​ពី El Crack Deportivo បាន​ឲ្យ​ដឹង​ថា ក្លឹប​អធិរាជស Real Madrid, Manchester United និង Liverpool សុទ្ធ​តែ​មាន​ចំណាប់​អារម្មណ៍​លើ​ការ​ផ្ទេរ Rodrigo Bentancur បើ​ទោះបី​ជា Tottenham Hotspur ហាក់​ដូច​ជា​មិន​ចង់​លក់​កីឡាករ​រូប​នេះ​ក៏​ដោយ។

ប្រភព: Sportsmole