ក្លឹប​បិសាចក្រហម អាច​នឹង​ដាក់ Jadon Sancho ឲ្យ​ខ្ចី​ជើង​ទៅ​ក្លឹប​ផ្សេង​នៅ​ខែ​មករា​ឆ្នាំ​ក្រោយ

យោងតាម​របាយការណ៍​ចុងក្រោយ​មួយ​បាន​ឲ្យ​ដឹង​ថា ក្លឹប​បិសាចក្រហម Manchester United អាច​នឹង​អនុញ្ញាត​ឲ្យ​ខ្សែ​ប្រយុទ្ធ​ស្លាប Jadon Sancho ចាកចេញ​ពី​ក្លឹប​ក្នុង​លក្ខខណ្ឌ​ខ្ចី​ជើង​ក្នុង​អំឡុង​ទីផ្សារ​ដោះដូរ​កីឡាករ​នា​ខែមករា​ខាង​មុខ​នេះ។

យ៉ាង​ណា​មិញ​ដំបូង​ឡើយ​ក្លឹប​បិសាចក្រហម បាន​ចុះ​ហត្ថលេខា​លើ Jadon Sancho ក្នុង​ឆ្នាំ 2021 ដោយ​ពេល​នោះ​មាន​ការ​ប្រកួត​ប្រជែង​ពី​ក្លឹប​ធំៗ​ជា​ច្រើន។ យ៉ាង​ណា​ខ្សែ​ប្រយុទ្ធ​ស្លាប​រូបនេះ​បាន​ផ្ទេរ​មក Old Trafford បាន​សម្រេច​ជា​មួយ​នឹង​តម្លៃ​ផ្ទេរ 85 លានអឺរ៉ូ។

ទោះ​ជា​យ៉ាង​ណា​ក៏​ដោយ Jadon Sancho មិន​បាន​រក្សា​ទម្រង់​លេង​ដ៏​ល្អ​ដែល​គាត់​មាន​កាល​ពី​នៅ​ក្លឹប Borussia Dortmund ឡើយ ដែល​វា​ខុស​ពី​អ្វី​ដែល​អ្នកគាំទ្រ​រំពឹង​ទុក។ នៅ​រដូវកាល​ដំបូង​របស់​គាត់​នៅ Old Trafford កីឡាករ​សញ្ជាតិ​អង់គ្លេស​រូប​នេះ​រក​បាន​គ្រាប់​បាល់​ត្រឹមតែ 5 គ្រាប់ និង Assists 3 ប៉ុណ្ណោះ ក្នុង​ការ​បង្ហាញ​ខ្លួន​ចំនួន 38 ប្រកួត​នៅ​គ្រប់​ព្រឹត្តិការណ៍​ទាំងអស់​របស់​ក្លឹប។

យោងតាម​របាយការណ៍​ពី TEAMtalk បាន​ឲ្យ​ដឹង​ថា Jadon Sancho អាច​ត្រូវ​ដាក់​ឲ្យ​ខ្ចី​ជើង​ទៅ​ក្លឹប​ផ្សេង ដើម្បី​ឲ្យ​គាត់​មាន​ទំនុក​ចិត្ត និង​ទម្រង់​លេង​ល្អ​ឡើង​វិញ។ ថ្វី​ត្បិត​តែ Manchester United ទើប​តែ​បាត់បង់ Cristiano Ronaldo ក៏​ដោយ ប៉ុន្តែ​ពួក​គេ​ត្រូវ​តែ​បង្ខំ​ចិត្ត​ធ្វើ​បែប​នេះ ដើម្បី​ឲ្យ Sancho មាន​ទម្រង់​លេង​ដល់​ចំណុច​កំពូល​ដូច​ពី​មុន​វិញ។

ប្រភព: Sportsmole