Alexis Mac Allister កំពុង​ត្រូវ​បាន​ក្លឹប​ធំៗ​ជា​ច្រើន​ចាប់​អារម្មណ៍ រួម​ទាំង Arsenal ផង​ដែរ

ក្លឹប​កាំភ្លើងធំ Arsenal ត្រូវ​បាន​គេ​រាយការណ៍​ថា បាន​ចូល​រួម​ក្នុង​ការ​ប្រកួត​ប្រជែង​ជាមួយ​ក្លឹប​មួយ​ចំនួន​ដែល​មាន​ទាំង Tottenham Hotspur ផង​ដែរ ដើម្បី​ចុះ​ហត្ថលេខា​លើ​តារា​ឆ្នើម​របស់​ក្លឹប Brighton គឺ​ខ្សែបម្រើ Alexis Mac Allister ដែល​ជា​មិត្ត​រួម​ក្រុម​ជម្រើស​ជាតិ​របស់ Lionel Messi។

យ៉ាង​ណា​មិញ​កីឡាករ​វ័យ 23 ឆ្នាំ​រូបនេះ​បាន​ចាប់​ផ្តើម​ជាមួយ​នឹង​ទម្រង់​លេង​គួរ​ឲ្យ​ចាប់​អារម្មណ៍​ខ្លាំង​ក្នុង​យុទ្ធនាការ​រដូវកាល​ថ្មី 2022-2023 ជា​មួយ Brighton ដោយ​ស៊ុតបញ្ចូលទី​បាន 5 គ្រាប់​ក្នុង​ការ​បង្ហាញ​ខ្លួន 14 ប្រកួត​នៅ Premier League។ បន្ទាប់​មក​ខ្សែបម្រើ​រូបនេះ​ត្រូវ​បាន​លោក Lionel Scaloni កោះ​ហៅ​ឲ្យ​ចូល​ក្រុម​ជម្រើស​ជាតិ​អាហ្សង់ទីន សម្រាប់​បេសកកម្ម​នៅ​កាតា។ ​Alexis Mac Allister ទទួល​បាន​ជោគជ័យ​ជាមួយ​ក្រុម​ជម្រើស​ជាតិ ដោយ​បាន​ជួយ​ជ្រោមជ្រែង​ជា​ចំណែក​ដ៏​សំខាន់ ក្នុង​ការ​លើកពាន World Cup ជាមួយ​អាហ្សង់ទីន។

បុរស​ដែល​ពូកែ​អៀនប្រៀន Mac Allister ពេល​នេះ​បាន​ត្រឡប់​ទៅ​ប្រទេស​កំណើត​របស់​គាត់​វិញ​ជាមួយ​នឹង​មិត្ត​រួម​ក្រុម​ជម្រើស​ជាតិ​អាហ្សង់ទីន ដើម្បី​អបអរ​ភាព​ជោគជ័យ​របស់​ពួក​គេ​ក្នុង​ការ​ឈ្នះពាន FIFA World Cup ហើយ​ត្រូវ​បាន​គ្រូបង្វឹក​លោក Roberto De Zerbi អនុញ្ញាត​ឲ្យ​សម្រាក​រយៈពេល 2 សប្តាហ៍។

ជាមួយ​នឹង​ទម្រង់​លេង​ដ៏​ល្អ​របស់ Alexis Mac Allister សម្រាប់​​ក្រុម​ជម្រើស​ជាតិ ត្រូវ​បាន​គេ​ជឿថា ក្លឹប​ធំៗ​ជា​ច្រើន​នៅ​តំបន់​អ៊ឺរ៉ុប​ចាប់​អារម្មណ៍​ចង់​ចុះ​ហត្ថលេខា​លើ​គាត់។ របាយការណ៍​ថ្មីៗ​ចុងក្រោយ​នេះ​បាន​អះអាង​ថា ក្លឹប​មាន់ខ្នាយ​មាស Tottenham Hotspur គឺ​ជា​ក្រុម​មួយ​ក្នុង​ចំណោម​ក្រុម​ចំនួន 5 រួម​ជាមួយ Arsenal, Juventus, Inter Milan និង Atletico Madrid ដែល​កំពុង​ពិចារណា​ដេញ​ថ្លៃ​ខ្សែបម្រើ​រូប​នេះ។

ប្រភព: Sportsmole