ស្ងាត់ៗ Chelsea ត្រៀម​ដេញថ្លៃ​លើ​ខ្សែបម្រើ Enzo Fernandez ក្នុង​តម្លៃ​ផ្ទេរ​លើស​ពី 100 លានផោន

ក្លឹប​តោខៀវ Chelsea ត្រូវ​បាន​គេ​រាយការណ៍​មក​ថា បាន​ជូន​ដំណឹង​ដល់​ក្លឹប Benfica ហើយ ដោយ​ពួក​គេ​ត្រៀម​នឹង​ចំណាយ​ប្រាក់​ដល់ 115 លានផោន ដើម្បី​ចុះ​ហត្ថលេខា​លើ​ខ្សែបម្រើ​ឆ្នើម Enzo Fernandez ដែល​ការ​ផ្ទេរ​នឹង​ដំណើរ​ការ​នៅ​ខែ​មករា​ខាង​មុខ​នេះ។

ក្លឹប​យក្ស​នៅ​ព័រទុយហ្គាល់ Benfica កំពុង​សម្លឹង​រក​ប្រាក់​ចំណេញ​រាប់​លាន​ពី​ការ​លក់ Enzo Fernandez បន្ទាប់​ពី​ខ្សែបម្រើ​រូប​នេះ​មាន​ទម្រង់​លេង​លេច​ធ្លោរ​ខ្លាំង ហើយ​ត្រូវ​បាន​ក្លឹប​ធំៗ​ជា​ច្រើន​ចាប់​អារម្មណ៍។ ខ្សែបម្រើ​រូប​នេះ ត្រូវ​បាន​ក្លឹប Benfica ចុះ​ហត្ថលេខា​ផ្ទេរ​ជា​ផ្លូវការណ៍​នៅ​ថ្ងៃទី 14 ខែ​កក្កដា​ឆ្នាំ​នេះ​​ពី River Plate ក្នុង​ត្រឹមតែ 18 លានអឺរ៉ូ​តែ​ប៉ុណ្ណោះ។

Enzo Fernandez គឺ​ជា​អតីត​មិត្ត​រួម​ក្រុម​របស់ Julian Alvarez និង​បាន​ចាកចេញ​ពី River Plate ក្នុង​ពេល​ដំណាល​គ្នា ខណៈ​ដែល Julian Alvarez បាន​ផ្ទេរ​ទៅ​លេង​នៅ​ទឹកដី​អង់គ្លេស​ជាមួយ​ក្លឹប Manchester City។ ចាប់​តាំង​ពី​ពេល​នោះ​មក​ទាំង Fernandez និង Alvarez សុទ្ធ​តែ​បាន​អភិវឌ្ឍន៍​ខ្លួន​ទៅ​ជា​តារា​ឆ្នើម​វ័យក្មេង ដែល​មាន​ទម្រង់​លេង​លេច​ធ្លោរ​បំផុត​នៅ​ក្នុង​ពិភព​បាល់ទាត់ ហើយ​អ្នក​ទាំង 2 ថែម​ទាំង​បាន​លើក​ពាន FIFA World Cup 2022 ជាមួយ​អាហ្សង់ទីន​ថែម​ទៀត​ផង។

យ៉ាង​ណា​មិញ​ក្នុង​ពេល​ប៉ុន្មាន​សប្តាហ៍​ថ្មីៗ​នេះ គេ​បាន​រាយការណ៍​យ៉ាង​ច្រើន​ពី Enzo Fernandez ដែល​ត្រៀម​នឹង​ចាកចេញ​ពី​ក្លឹប​បច្ចុប្បន្ន​របស់​ខ្លួន ហើយ​ក្លឹប Benfica ចង់​បាន​តម្លៃ​ផ្ទេរ​​យ៉ាង​ហោច​ណាស់ 105 លានផោន ប៉ុន្តែ​ពួក​គេ​នៅ​មិន​ទាន់​ចង់​លក់​ខ្សែបម្រើ​រូប​នេះ​នៅ​ពេល​ឥឡូវ​ឡើយ គឺ​រង​ចាំ​ដល់​ចប់​រដូវកាល។

ទោះ​ជា​យ៉ាង​ណា​ក៏​ដោយក្លឹប Newcastle United, Liverpool និង Real Madrid ត្រូវ​បាន​គេ​ដឹង​ថា បាន​ព្យាយាម​តាម​ចរចា​ផ្ទេរ​តារា​ឆ្នើម​វ័យ 21 ឆ្នាំ​រូប​នេះ​រហូត​មក។ ដូចគ្នា​នេះ​ដែរ របាយការណ៍​ច្បាស់ការណ៍​មួយ​ដែល​ត្រូវ​បាន​លេចលឺ​នៅ​ថ្ងៃ​នេះ​បាន​អះអាង​ថា ក្លឹប​តោខៀវ Chelsea មាន​គោលជំហរ​ច្បាស់លាស់ ក្នុង​ការ​ចំណាយ​លុយ​ធំ​ទៅ​លើ Fernandez ដើម្បី​អាច​ឲ្យ Benfica យល់​ព្រម​លក់​ខ្សែបម្រើ​រូប​នេះ​ទៅ​ឲ្យ​ពួក​គេ​នៅ​ខែ​មករា​ដើម​ឆ្នាំ​ក្រោយ។

ប្រភព: Sportsmole