Tottenham Hotspur ដាក់​សំណើរ 13.3 លានផោន ដើម្បី​ទិញ​យក Franck Kessie របស់ Barcelona

ក្លឹប​មាន់​ខ្នាយមាស Tottenham Hotspur ត្រូវ​បាន​គេ​រាយ​ការណ៍​ថា បាន​ដាក់​សំណើរ​ជា​ទឹកប្រាក់​ចំនួន 15 លានអឺរ៉ូ សម្រាប់​កីឡាករ Franck Kessie របស់​ក្លឹប​អ្នក​មាន​បុណ្យ Barcelona។ ខ្សែ​បម្រើ​កណ្តាល​រូប​នេះ​បាន​ផ្លាស់​ទៅ Camp Nou កាល​ពី​រដូវ​ក្តៅ​ឆ្នាំ​មុន បន្ទាប់​ពី​ផុត​កុងត្រា​ជាមួយ AC Milan។

Tottenham Hotspur គឺ​ជា​ក្លឹប​មួយ​ក្នុង​ចំណោម​ក្លឹប​ផ្សេងៗ​ទៀត ដែល​ធ្លាប់​បាន​ចាប់​អារម្មណ៍​លើ​កីឡាករ​សញ្ជាតិ​កូតឌីវ័រ Franck Kessie នៅ​ពេល​ដែល​ដឹង​ច្បាស់​ថា គាត់​នឹង​ចាកចេញ​ពី​អតីត​ក្លឹប​ចាស់ AC Milan។ យ៉ាង​ណា​ទីបំផុត Barcelona ក៏​ចុះ​ហត្ថលេខា​លើ Franck Kessie បាន​សម្រេច។

ទោះ​បី​ជា​យ៉ាង​ណា​ក៏​ដោយ មួយ​រយៈ​កាល​ចុងក្រោយ​នេះ Franck Kessie ហាក់​ដូច​ជា​មិន​មែន​ជា​ផ្នែក​មួយ​ដែល​សំខាន់​សម្រាប់ Barcelona ឡើយ ខណៈ​ដែល​រដូវលកាល​នេះ​គាត់​បាន​បង្ហាញ​ខ្លួន​ចំនួន 13 ប្រកួត ប៉ុន្តែ​បាន​បង្ហាញ​ខ្លួន​ជា​ជម្រើស​ដំបូង​ត្រឹមតែ 2 ដង​ប៉ុណ្ណោះ​សម្រាប់​ក្របខណ្ឌ La Liga។

យោង​តាម​អ្នក​កាសែត​អេស្ប៉ាញ Alfredo Martinez បាន​ឲ្យ​ដឹង​ថា ក្លឹប​មាន់ខ្នាយមាស Tottenham Hotspur បាន​ដាក់​សំណើរ​ចំនួន 15 លានអឺរ៉ូ (13.3 លានផោន) សម្រាប់ Franck Kessie ដោយ​ពួក​គេ​សង្ឃឹម​ថា នឹង​ចុះ​ហត្ថលេខា​លើ​គាត់​ក្នុង​អំឡុង​ពេល​ទីផ្សារ​ដោះដូរ​កីឡាករ​ខែ​មករា​ខាង​មុខ​នេះ បើ​ទោះ​បី​ជា​ប្រធាន​ក្លឹប Barcelona លោក Joan Laporta បាន​ទទូច​ថា គាត់​គ្មាន​ចេតនា​ក្នុង​ការ​លក់​ខ្សែបម្រើ​កណ្ដាល​សញ្ជាតិ​កូតឌីវ័រ​ក្នុង​ពេល​នេះ​ក៏​ដោយ។

ប្រភព: Sportsmole