Luis Suarez បង្ហាញ​អារម្មណ៍​សប្បាយ​ចិត្ត ដែល​បាន​ផ្ទេរ​មក​ក្លឹប​ថ្មី Gremio

ខ្សែ​ប្រយុទ្ធ​សញ្ជាតិ​អ៊ុយរូហ្គាយ Luis Suarez បាន​បង្ហាញ​អារម្មណ៍​រំភើប​បន្ទាប់​ពី​​ចូលរួម​ជាមួយ​ក្លឹប​ថ្មី Gremio នៃ​ក្របខណ្ឌ Serie A របស់​ប្រេស៊ីល លើ​ការ​ផ្ទេរ​ដោយ​គ្មាន​តម្លៃ​ខ្លួន។ Luis Suarez បាន​ចុះ​ហត្ថលេខា​លើ​កិច្ច​ព្រមព្រៀង​ជាមួយ​ក្លឹប Gremio កាល​ពី​ថ្ងៃសៅរ៍​កន្លង​ទៅ ជា​មួយ​នឹង​កុងត្រា​ដែល​មាន​សុពលភាព​រហូត​ដល់​ចុង​ឆ្នាំ 2024។

កីឡាករ​វ័យ 35 ឆ្នាំរូបនេះ​បាន​ត្រឡប់​ទៅ​ក្លឹប Nacional ដែល​ជា​ក្លឹប​កាល​ពី​កុមារភាព​របស់​គាត់ បន្ទាប់​ពី​ផុត​កុងត្រា​ជាមួយ Atletico Madrid កាល​ពី​ខែ​កក្កដា​ឆ្នាំ​មុន ហើយ​បាន​ស្នាក់​នៅ​ត្រឹម​តែ 3 ខែ​ប៉ុណ្ណោះ។ អតីត​ខ្សែ​ប្រយុទ្ធ​ឆ្នើម​របស់ Barcelona និង Liverpool រូប​នេះ​ស៊ុត​បញ្ចូល​ទី​បាន​ត្រឹមតែ 8 គ្រាប់​ក្នុង​ការ​បង្ហាញ​ខ្លួន 16 ប្រកួត អំឡុង​ពេល​នៅ​ជាមួយ​ក្លឹប Nacional។

Luis Suarez ត្រូវ​បាន​គេ​រំពឹង​ថា នឹង​លេង​ការ​ប្រកួត​ដំបូង​របស់​គាត់​សម្រាប់ Gremio ទល់​នឹង​ក្លឹប Sao Luiz នៅ​ថ្ងៃ​ទី 17 ខែ​មករា​ខាង​មុខ​នេះ។ ដូចគ្នា​នេះ​ដែរ បន្ទាប់​ពី​បាន​ចូលរួម​ជាមួយ Gremio កីឡាករ Luis Suarez បាន​បង្ហោះ​នៅ​លើ Twitter របស់​ខ្លួន​ថា៖ “ការ​ត្រៀមខ្លួន​សម្រាប់​ការ​ប្រកួត​ប្រជែង​ដ៏​ល្អ​សម្រាប់ Gremio ខ្ញុំ​ពិត​ជា​រំភើប​ដែល​បាន​នៅ​ទី​នេះ ហើយ​រីករាយ​ជា​មួយ​វា”។

ប្រភព: Dailypost NG