Chelsea យល់​ព្រម​លើ​កិច្ច​ព្រមព្រៀង​ផ្ទេរ Enzo Fernandez ក្នុង​តម្លៃ 112 លានផោន

ក្លឹបតោខៀវ Chelsea ត្រូវ​បាន​គេ​រាយការណ៍​ថា បាន​ឈាន​ដល់​កិច្ច​ព្រមព្រៀង​ជាមួយ​ក្លឹប Benfica ដើម្បី​ចុះ​ហត្ថលេខា​លើ​កីឡាករ​ឆ្នើម Enzo Fernandez ក្នុង​តម្លៃ​ដ៏​ខ្ពស់​ក្នុង​កំណត់ត្រា​របស់ Premier League ជាមួយ​នឹង​ទំហំ​ទឹកប្រាក់​រហូត​ដល់ 112 លានផោន។

យ៉ាង​ណា​មិញ​ខ្សែបម្រើ​វ័យ 21 ឆ្នាំ​រូបនេះ​បាន​ទាក់ទាញ​ចំណាប់​អារម្មណ៍​ពី​ក្លឹប​ធំៗ​ជា​ច្រើន​នៅ​តំបន់​អឺរ៉ុប បន្ទាប់​គាត់​បាន​ឈ្នះពាន​ជា​កីឡាករ​វ័យក្មេង​ប្រចាំ​ព្រឹត្តិការណ៍​នៃ​ការ​ប្រកួត FIFA World Cup ឆ្នាំ 2022 និង​ថែម​ទាំង​បានលើក​ពាន​ជា​មួយ​​ក្រុមជម្រើស​ជាតិ​អាហ្សង់ទីន​ផង​ដែរ។ ជាមួយ​នឹង​កុងត្រា​របស់ Enzo Fernandez នៅ Benfica រហូត​ដល់​ថ្ងៃទី 30 ខែ​មិថុនា ឆ្នាំ 2027 នោះ ក្លឹប​ណា​ដែល​ចង់​ចុះ​ហត្ថលេខា​គាត់​យក​ទៅ នឹង​ត្រូវ​ចំណាយ​ប្រាក់​ដ៏​ច្រើន​សន្ធឹកសន្ធាប់​បំផុត។

ទោះ​ជា​យ៉ាង​ណា​ក៏​ដោយ របាយការណ៍​ថ្មីៗ​នេះ​បាន​អះអាង​ថា ក្លឹប​តោខៀវ Chelsea បាន​យល់​ព្រម​លើលក្ខខណ្ឌ​ផ្ទាល់​ខ្លួន​រួច​ហើយ​ជា​មួយ Fernandez ដែល​ជា​ការ​បញ្ចុះបញ្ចូល​ឲ្យ​គាត់​ផ្ទេរ​មក​ចូលរួម​ជា​មួយ​ក្រុម​របស់​លោក Graham Potter បន្ទាប់​ពី​មាន​ការ​ពិភាក្សា​ក្រៅ​ផ្លូវការណ៍​មួយ កាល​ពី​ប៉ុន្មាន​ថ្ងៃ​មុន។ ទន្ទឹម​នឹង​នេះ​ដែរ យោងតាម Sky Sports អ៊ីតាលី បាន​ឲ្យ​ដឹង​ថា ក្លឹប​តោខៀវ Chelsea បាន​ឈាន​ដល់​ជំហាន​ចុងក្រោយ​ហើយ ដើម្បី​បញ្ចប់​កិច្ច​ព្រមព្រៀង​ផ្ទេរ​សម្រាប់​ខ្សែបម្រើ​រូប​នេះ នៅ​ក្នុង​តម្លៃ​ដ៏​ច្រើន​រហូត​ដល់ 112 លានផោន។

ប្រភព: Sportsmole