Aston Villa បដិសេធ​មិន​បាន​ចុះ​ហត្ថលេខា​លើ Harry Maguire ឡើយ

ក្លឹប Aston Villa ត្រូវ​បាន​គេ​រាយការណ៍​ថា នឹង​មិន​មាន​​កិច្ចព្រមព្រៀង​ក្នុង​ការ​ចុះ​ហត្ថលេខា​លើ Harry Maguire ពី​ក្លឹប​បិសាចក្រហម Manchester United ទេ ខណៈ​ដែល​កាល​ពី​ពេល​ថ្មីៗ​នេះ​មាន​ពាក្យ​ចចាម​អារ៉ាម​ជា​ច្រើន​លើក​ឡើង​ថា Aston Villa ចង់​ចុះ​ហត្ថលេខា​លើ​ខ្សែ​ការពារ​សញ្ជាតិ​អង់គ្លេស​រូប​នេះ។

យ៉ាង​ណា​មិញ​កីឡាករ​​វ័យ 29 ឆ្នាំ​​រូប​នេះ បាន​ធ្លាក់​ចុះ​នូវ​ទម្រង់​លេង​យ៉ាង​ខ្លាំង​នៅ Old Trafford ហើយ​​កំពុង​​ត្រូវ​បាន​គេ​រំពឹង​ថា នឹង​ចាកចេញ​ពី​ក្លឹប​បច្ចុប្បន្ន​របស់​ខ្លួន​នៅ​ដើម​ឆ្នាំ​នេះ។ ទោះ​ជា​យ៉ាង​ណា Harry Maguire នៅ​តែកាន់កាប់​តួនាទី​ជា​កាពីតែន​ក្រុម​របស់​លោក Erik ten Hag ប៉ុន្តែ​គាត់​បាន​បង្ហាញ​ខ្លួន​ត្រឹម​តែ 4 ដង​ប៉ុណ្ណោះ​នៅ Premier League និង​ការ​ប្រកួត Europa League បាន​ម្ដង​ផង​ដែរ។

ដោយ​ឡែក របាយការណ៍​កាល​ពី​ថ្ងៃ​អាទិត្យ​ម្សិល​មិញ​នេះ​បាន​អះអាង​ថា ក្លឹប Aston Villa ជិត​ឈាន​ដល់​ការ​បញ្ចប់​កិច្ច​ព្រមព្រៀង​ផ្ទេរ​សម្រាប់ Harry Maguire ហើយ ខណៈ​ដែល​កុងត្រា​របស់​គាត់​នៅ Old Trafford នឹង​មាន​សុពលភាព​រហូត​ដល់​ឆ្នាំ 2025។ ផ្ទុយ​មក​វិញ ការ​រាយការណ៍​ចុងក្រោយ​ពី​អ្នកកាសែត Fabrizio Romano នៅ​ថ្ងៃ​នេះ​បាន​អះអាង​ថា នឹង​មិន​មាន​អ្វី​កើត​ឡើង​រវាង Harry Maguire និង​ក្លឹប Aston Villa នោះ​ឡើយ ហើយ​ខ្សែការពារ​រូប​នេះ​នឹង​បន្ត​នៅ Manchester United រហូត​ដល់​ចប់​រដូវកាល។

ប្រភព: Sportsmole