Luis Enrique អាច​នឹង​ក្លាយ​ជា​គ្រូ​បង្វឹក​ថ្មី​របស់​ក្រុម​ជម្រើស​ជាតិ​ប្រេស៊ីល

អតីត​គ្រូ​បង្វឹក​របស់​ក្លឹប Barcelona លោក Luis Enrique ថ្មីៗ​នេះ​ត្រូវ​បាន​គេ​រាយការណ៍​ថា កំពុង​ស្ថិត​ក្នុង​បេក្ខភាព​ដែល​មាន​ភាគរយ​ខ្ពស់ ដើម្បី​ក្លាយ​ជា​គ្រូ​បង្វឹក​ថ្មី​របស់​ក្រុម​ជម្រើស​ជាតិ​ប្រេស៊ីល (នេះ​បើ​យោង​តាម​ការ​ចុះផ្សាយ​របស់ SPORT អេស្ប៉ាញ)។

យ៉ាង​ណា​មិញ​អតីត​គ្រូ​បង្វឹក​លោក Tite បាន​ចុះ​ចេញ​ពី​តំណែង​បន្ទាប់​ពី​ក្រុម​របស់​ខ្លួន​ធ្លាក់​ចេញ​ពី​ការ​ប្រកួត FIFA World Cup ឆ្នាំ 2022។ ជាមួយ​គ្នា​នេះ​ដែរ​លោក Luis Enrique ដែល​ធ្លាប់​ជា​គ្រូ​បង្វឹក​ក្រុម​​ជម្រើស​ជាតិ​អេស្ប៉ាញ​ ក៏​បាន​ចុះ​ចេញ​ពី​តំណែង​ដូច​គ្នា​ដែរ ក្រោយ​ក្រុម​របស់​គាត់​​ធ្លាក់​​ក្នុង​វគ្គ 16 ក្រុម​ចុងក្រោយ ក្រោម​ស្នា​ដៃ​របស់​ម៉ារ៉ុក។

សហព័ន្ធ​បាល់ទាត់​ប្រេស៊ីល (CBF) គ្រោង​នឹង​ស្វែងរក ក៏​ដូច​ជា​តែងតាំង​អ្នក​ស្នង​តំណែង​របស់​លោក Tite ដែល​ក្នុង​​នោះ មាន​បេក្ខភាព​ជា​ច្រើន​ដូច​ជា​លោក Carlo Ancelotti, លោក Jose Mourinho, លោក Luis Enrique និង​លោក Pep Guardiola។

ប្រសិន​បើ​គ្រូ​បង្វឹក​ណា​ម្នាក់ ក្នុង​ចំណោម​គ្រូ​បង្វឹក​ទាំង​នេះ អាច​ក្លាយ​ជា​អ្នក​ស្នង​តំណែង​របស់​លោក Tite មាន​ន័យ​ថា នេះ​ជា​លើក​ដំបូង​ក្នុង​រយៈពេល 57 ឆ្នាំ​ចុងក្រោយ​របស់​ពួកគេ ដែល​តែងតាំង​គ្រូបង្វឹក​ដឹក​នាំ​ក្រុម​ជម្រើស​ជាតិ​​មិន​មែន​ជា​ជន​ជាតិ​ប្រេស៊ីល។ គួរ​រំលឹក​ផង​ដែរ​ថា លោក Filip Nunez ជា​ជនជាតិ​អាហ្សង់ទីន (1965) គឺ​ជា​បុរស​ចុងក្រោយ​ដែលមិន​មែន​ជា​ជនជាតិ​ប្រេស៊ីល និង​កាន់​តំណែង​ជា​គ្រូ​បង្វឹក​របស់​ក្រុម​ជម្រើស​ជាតិ​មួយ​នេះ។

ប្រភព: Sportskeeda