Luke Shaw អាច​ប្រឈម​នឹង​ការ​មិន​បាន​ចូល​លេង គ្រប់​ប្រកួត​ទាំង​អស់​ដែល​នៅ​សល់

ខ្សែការពារ Luke Shaw របស់​ក្រុម​បិសាចក្រហម Manchester United ទំនង​ជា​មាន​មន្ទិល​សង្ស័យ ក្នុងការ​លេង​បន្ត​ទៀត​នៅរដូវកាល​នេះ បន្ទាប់​ពី​ការ​វះកាត់​កាល​ពី​ពេល​ថ្មីៗ ដើម្បីដក​ដែក​ចេញ​ពី​ជើង​របស់​គាត់។

ខ្សែការពារ​ឆ្វេង Luke Shaw ត្រូវបាន​ទទួល​ការគម្រាម​កំហែង​ដល់​អាជីព​បាល់ទាត់​របស់​គាត់​ដោយ​មិន​បាន​ជាសះស្បើយ​ឡើយ ចាប់​តាំង​ពី​ឆ្នាំ 2015 ដែល​គាត់​បាន​រងរបួស ក្នុង​អំឡុង​ពេល​ការ​ប្រកួត Champions League ជាមួយ PSV Eindhoven។

ដោយ​ឡែក គ្រូបង្វឹក លោក Ralf Rangnick បាន​បញ្ជាក់កាល​ពី​សប្តាហ៍​មុន​ថា ក្រុម​របស់​លោក កំពុង​មានបញ្ហា​ជាមួយ​នឹង​ចំណុច​ខ្សោយ​នៅ​តំបន់​ដែល Luke Shaw ធ្លាប់​លេង។ Luke Shaw បាន​វះ​កាត់​កាល​ពីចុង​សប្តាហ៍​មុន ហើយ​នឹង​សម្រាក​ដោយ​ខកខាន​ការ​ប្រកួត​រហូតដល់ 3 សប្តាហ៍ ដើម្បី​ឲ្យ​របួស​បាន​ជាសះស្បើយ។

បន្ទាប់​ពី​ជា​សះ​ស្បើយ Luke Shaw ត្រូវ​បាន​គេ​រំពឹង​ថា នឹង​អាច​ចូល​លេង​វិញ​បាន ប៉ុន្តែ​ឥឡូវនេះ Shaw ត្រូវ​បាន​បន្ត​ឲ្យ​នៅ​សម្រាក​យូរ​ជាង​នេះ​ទៀត បន្ទាប់​ពី​ការ​វាយតម្លៃ​របស់​ផ្នែកវេជ្ជសាស្ត្រ​កាលពី​ពេល​ថ្មីៗ​នេះ។ ហើយ​លើក​នេះ​ដែរ នឹង​គ្មាន​ការ​កំណត់​ពេលវេលា​ណា​មួយ​ជាក់​លាក់​ឡើយ សម្រាប់​កីឡាករ Luke Shaw ដែល​​ប្រហែល​ជា​អាច​នឹង​ការ​ប្រកួត​នៅ​រដូវកាលនេះ​ជិត​បិទ​បញ្ចប់​ឯណោះ។

ប្រភព: 90 Min