គ្រូបង្វឹក​អាហ្សង់ទីន Lionel Scaloni ប្រាប់​ថា ថ្ងៃ​ណា​មួយ​គាត់​ចង់​ទៅ​ដឹកនាំ​ក្រុម​ជម្រើស​ជាតិ​អេស្ប៉ាញ ប្រសិន​បើ​មាន​ឱកាស

គ្រូ​បង្វឹក​របស់​ក្រុម​ជម្រើស​ជាតិ​អាហ្សង់ទីន​លោក Lionel Scaloni បាន​និយាយ​ថា គាត់​នឹង​រីករាយ​ក្នុង​ការ​ក្លាយ​ជា​គ្រូ​បង្វឹក​របស់​ក្រុម​ជម្រើស​ជាតិ​អេស្ប៉ាញ ប្រសិន​បើ​មាន​ឱកាស​ល្អ​ណា​មួយ​អំណោយ​ផល និង​ចប់​ភារកិច្ច​ជា​មួយ​អាហ្សង់ទីន។ គ្រូ​បង្វឹក​រូប​នេះ​ថែម​ទាំង​បាន​បញ្ជាក់​បន្ថែម​ថា អេស្ប៉ាញ​គឺ​ជា​ផ្ទះ​ទី 2 របស់​គាត់។

យ៉ាង​ណា​មិញ Lionel Scaloni បាន​ជួយ​ឲ្យ​ក្រុម​ពពកស​អាហ្សង់ទីន​ឈ្នះពាន​រង្វាន់​ដ៏​អស្ចារ្យ​បំផុត​ក្នុង​ពិភព​បាល់ទាត់​គឺ FIFA World Cup កាល​ពី​ខែ​មុន។ ពួក​គេ​បាន​យក​ឈ្នះ​ក្រុម​ការពារ​តំណែង​ជើង​ឯក​បារាំង​ក្នុង​​វគ្គ​ផ្តាច់ព្រ័ត្រ​ជាមួយ​នឹង​ការ​ទាត់​បាល់​ប៉េណាល់ទី​កាត់​សេចក្ដី។ ក្រៅ​ពី​ពាន World Cup គ្រូ​បង្វឹក​រូប​នេះ​ថែម​ទាំង​បាន​ដឹកនាំ​ក្រុម​ជម្រើស​ជាតិ​របស់​ខ្លួន​ឲ្យ​ឈ្នះ​ពាន Copa America 2021 និង Finalissima 2022 ថែម​ទៀត​ផង។

ទន្ទឹម​នឹង​នេះ​ដែរ ក្រុម​ជម្រើស​ជាតិ​អេស្ប៉ាញ​ហាក់​ដូច​ជា​មាន​ទម្រង់​លេង​មិន​សូវ​ល្អ​ឡើយ ដោយ​ពួក​គេ​បាន​តស៊ូ​យ៉ាង​លំបាក​នៅ​ក្នុង​ការ​ប្រកួត​ប្រជែង​ពាន FIFA World Cup នៅ​ប្រទេស​កាតា និង​បាន​ធ្លាក់​ត្រឹម​វគ្គ 16 ក្រុម​ចុងក្រោយ​ក្រោម​ស្នាដៃ​របស់​ក្រុម​ជម្រើស​ជាតិ​ម៉ារ៉ុក។ ក្រោយ​ព្រឹត្តិការណ៍ World Cup បញ្ចប់​ទៅ​លោក​ Luis Enrique ក៏​បាន​​ចុះ​ចេញ​ពី​តំណែង​ជា​គ្រូ​បង្វឹក​ផង​ដែរ ដែល​ធ្វើ​ឲ្យ​បច្ចុប្បន្ន​នេះ​អេស្ប៉ាញ​មិន​មាន​គ្រូ​បង្វឹក​ដឹកនាំ​ឡើយ។

ថ្មីៗ​នេះ​នៅ​ក្នុង​កម្ម​វិធី El Partidazo លោក Lionel Scaloni ត្រូវ​បាន​គេ​សួរ​ថា តើ​គាត់​នឹង​បើក​ចិត្ត​ដើម្បី​ក្លាយ​ជា​អ្នក​ដឹកនាំ​ក្រុម​ជម្រើស​ជាតិ​អេស្ប៉ាញ​ថ្ងៃ​ណា​មួយ រឺ​ទេ? ពេល​នោះ​លោក Lionel Scaloni បាន​ឆ្លើយ​ប្រាប់​ថា៖ “ហេតុ​អ្វី​មិន​អាច? អេស្ប៉ាញ​​ជា​ផ្ទះ​ទីពីរ​របស់​ខ្ញុំ។ ខ្ញុំ​ស្រឡាញ់​ការ​រស់​នៅ​ទីនោះ ជាមួយ​នឹង​អ្វី​ពួកគេ​ធ្លាប់​បាន​ផ្ដល់​ឲ្យ​ខ្ញុំ”។

ប្រភព: Sportskeeda