Chelsea អាច​នឹង​សម្រេច​ចិត្ត​ដោះដូរ Hakim Ziyech ជាមួយ Franck Kessie

ក្លឹប​តោខៀវ Chelsea កំពុង​ចាប់​អារម្មណ៍​លើ​កិច្ច​ព្រមព្រៀង​ដោះដូរ​រវាង​ខ្សែ​ប្រយុទ្ធ​ស្លាប Hakim Ziyech និង​ខ្សែបម្រើ Franck Kessie របស់ Barcelona នេះ​បើ​យោង​តាម​ការ​ចុះផ្សាយ​របស់ SPORT នៃ​ប្រទេស​អេស្ប៉ាញ។

យ៉ាង​ណា​មិញ Barcelona កំពុង​លូកដៃ​ចូល​ក្នុង​ទីផ្សារ​ដោះដូរ​កីឡាករ​នា​ខែ​មករា​នេះ ដើម្បី​ស្វែងរក​បេក្ខភាព​ថ្មី​មក​ជំនួស​តំណែង​របស់ Memphis Depay ដែល​បាន​ចាកចេញ​ទៅ​ចូលរួម​ជាមួយ Atletico Madrid។ ប៉ុន្មាន​ថ្ងៃ​ចុងក្រោយ​នេះ កីឡាករ​សញ្ជាតិ​ម៉ារ៉ុក Hakim Ziyech ត្រូវ​ផ្សារ​ភ្ជាប់​ជា​មួយ​នឹង​ការ​ផ្ទេរ​មក​កាន់​ទឹកដី Spotify Camp Nou ដើម្បី​ជំនួស​កន្លែង​របស់ Memphis Depay។

ទន្ទឹម​នឹង​នេះ​ដែរ ក្លឹបតោខៀវ Chelsea ត្រូវ​បាន​គេ​ជឿ​ថា កំពុង​ពិចារណា​លើ​ការ​ផ្ទេរ Franck Kessie ស្រប​ពេល​ដែល​ខ្សែ​បម្រើ​សញ្ជាតិ​កូតឌីវ័រ​រូបនេះ ហាក់​ដូច​ជា​លែង​សំខាន់​សម្រាប់ Barcelona។ គ្រូ​បង្វឹក​លោក Xavi Hernandez នៅ​តែ​ជឿជាក់​លើ Pedri, Gavi, Sergio Busquets និង Frenkie de Jong ក្នុង​ជម្រើស​ដំបូង​របស់​ខ្លួន ខណៈ​ដែល Franck Kessie គ្រាន់​តែ​ជា​ជម្រើស​បន្ទាប់​បន្សំ។

ដោយ​ឡែក​សម្រាប់ Hakim Ziyech ក៏​មិន​សូវ​មាន​ឱកាស​លេង​ច្រើន​ផង​ដែរ​នៅ Stamford Bridge ហើយ​គាត់​ហាក់​ដូច​ជា​បង្ហាញ​ចេតនា​ក្នុង​ការ​ចង់​ចាកចេញ​នៅ​ខែ​មករា​នេះ។ បន្ទាប់​ពី​ការ​មក​ដល់​របស់ Joao Felix, Mykhailo Mudryk និង Noni Madueke ខ្សែបម្រើ​វ័យ 29 ឆ្នាំ​រូប​នេះ កាន់​តែ​ពិបាក​ក្នុង​ការ​ប្រជែង​ជម្រើស​ដំបូង​របស់​គ្រូ​បង្វឹក​លោក Graham Potter ថែម​មួយ​កម្រិត​ទៀត។ ជា​រួម ប្រសិន​បើ​ក្លឹប​ទាំង 2 រវាង Barcelona និង Chelsea ចរចា​ត្រូវ​រ៉ូវ​គ្នា​នោះ Hakim Ziyech និង Franck Kessie ជា​កីឡាករ​ផ្ទេរ​ដែល​ក្លឹប​ប្រើ​ក្នុង​ការ​​ដោះដូរ។

ប្រភព: Sportskeeda