Liverpool ត្រៀម​ចរចា​ផ្ទេរ Federico Chiesa របស់ Juventus

ក្លឹប​ហង្សក្រហម Liverpool ត្រូវ​បាន​គេ​រាយការណ៍​ថា បាន​កំណត់​យក​គោលដៅ​​លើ​ខ្សែប្រយុទ្ធ​របស់ Juventus គឺ​កីឡាករ Federico Chiesa ដើម្បី​ក្លាយ​ជា​អ្នកស្នង​តំណែង​របស់ Mohamed Salah ខណៈ​ដែល​ខ្សែ​ប្រយុទ្ធ​សញ្ជាតិ​អេហ្ស៊ីប​រូប​នេះ​ត្រូវ​បាន​គេ​មើល​ឃើញ​ថា ហាក់​ដូច​ជា​មិន​អាច​នៅ Anfield រយៈ​ពេល​យូរ​អង្វែង​រហូត​ដល់​ផុត​កុងត្រា​នោះ​ឡើយ។

កាល​ពី​ឆ្នាំ​មុន Mohamed Salah បាន​បដិសេធ​មិន​ព្រម​ផ្ទេរ​ទៅ Barcelona រឺ Real Madrid ហើយ​ទីបំផុត​គាត់​បាន​យល់ព្រម​លើ​ការ​បន្ត​កុងត្រា​ថ្មី​ជាមួយ​ក្រុម​របស់​លោក Jurgen Klopp រហូត​ដល់​ឆ្នាំ 2025។ បុរស​វ័យ 30 ឆ្នាំ​រូបនេះ​មាន​ទម្រង់​លេង​ល្អ​ប្រសើរ​ជា​ធម្មតា ក្នុង​រដូវកាល 2022-2023 ដោយ​ស៊ុតបញ្ចូលទី​បាន 17 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​ចំនួន 6 ដង ក្នុង​ការ​ប្រកួត​ចំនួន 29 ប្រកួត។

ទោះ​បី​ជា​យ៉ាង​ណា​ក៏​ដោយ Salah មិន​អាច​រក​គ្រាប់បាល់ រឺ Assist បាន​ឡើយ ក្នុង​ការ​បង្ហាញ​ខ្លួន​នៅ Premier League 4 លើក​ចុងក្រោយ​របស់​គាត់ សម្រាប់​ក្លឹប​ហង្សក្រហម ហើយ​ក្លឹប​របស់​គាត់​ក៏​កំពុង​ស្ថិត​ក្នុង​ទម្រង់​លេង​កាន់​តែ​យ៉ាប់​យ៉ឺន​ផង​ដែរ។ ស្រប​ពេល​ជា​មួយ​គ្នា​នេះ ខ្សែ​ប្រយុទ្ធ​ស្លាប​រូប​នេះ​ត្រូវ​បាន​គេ​សន្មត់​ថា អាច​នឹង​ត្រូវ​បាន​គេ​បញ្ចុះបញ្ចូល​ឲ្យ​ចែក​ផ្លូវ​គ្នា​ជាមួយ​ក្លឹប​បច្ចុប្បន្ន​របស់​គាត់ នៅ​ចុង​បញ្ចប់​នៃ​រដូវកាល​នេះ។

យោងតាម​របាយការណ៍​ពី Calciomercatoweb បាន​ឲ្យ​ដឹង​ថា ខ្សែប្រយុទ្ធ​ស្លាប​របស់ Juventus និង​ជា​កីឡាករ​របស់​ក្រុម​ជម្រើស​ជាតិ​អ៊ីតាលី Federico Chiesa កំពុង​ក្លាយ​ជា​បេក្ខភាព​ទី​មួយ​ដើម្បី​ជំនួស​កន្លែង​របស់ Mohamed Salah ស្រប​ពេល​ដែល Juventus កំពុង​ស្ថិត​ក្នុង​ស្ថានភាព​ប្រកួត​ប្រជែង​ដ៏​លំបាក់​នៅ Serie A ដូចគ្នា។

ប្រភព: Sportsmole