Real Madrid ត្រៀម​ស្នើ​​ដោះ​ដូរ Camavinga ជាមួយ Jude Bellingham

ក្លឹប​អធិរាជ​ស Real Madrid ត្រូវ​បាន​គេ​រាយការណ៍​ថា បាន​ត្រៀម​ខ្លួន​រួច​ជា​ស្រេច ក្នុង​ការ​ផ្តល់​សំណើរ​ដោយ​មាន​បូក​បញ្ចូល​ជាមួយ​នឹង​កីឡាករ Eduardo Camavinga ក្នុង​កិច្ច​ព្រមព្រៀង​ផ្ទេរ ដើម្បី​ចុះហត្ថលេខា​លើ​តារា​ឆ្នើម​របស់​ក្លឹប Borussia Dortmund គឺ​ខ្សែបម្រើ Jude Bellingham។

ដូចគ្នា​នេះ​ដែរ Camavinga ថ្មីៗ​នេះ​ត្រូវ​បាន​ផ្សារ​ភ្ជាប់​យ៉ាង​ខ្លាំង​ជាមួយ​នឹង​ការ​ចាកចេញ​ពី Santiago Bernabeu ដោយ​ត្រូវ​បាន​គេ​និយាយថា ក្លឹប​កាំភ្លើងធំ Arsenal ចាប់​អារម្មណ៍​ក្នុង​ការ​ខ្ចី​ជើង​កីឡាករ​វ័យ 20 ឆ្នាំ​រូប​នេះ។ ទោះ​ជា​យ៉ាង​ណា​ក៏​ដោយ ភ្នាក់ងារ​របស់ Camavinga លោក Joshua Barnett បាន​បដិសេធ និង​អះអាង​ថា ខ្សែបម្រើ​សញ្ជាតិ​បារាំង​រូប​នេះ មិន​ស្វែង​រក​ឱកាស​ក្នុង​ការ​ចាកចេញ​ពី​ក្លឹប​ឡើយ។

យ៉ាង​ណា​មិញ អនាគត​របស់ Camavinga ជា​មួយ​នឹង Real Madrid កំពុង​ស្ថិត​ក្នុង​ភាព​ស្រពិច​ស្រពិល ខណៈ​របាយការណ៍​ពី Sky Sports របស់​អាឡឺម៉ង់ បាន​រាយការណ៍​ថា ក្លឹប Real Madrid នឹង​ពិចារណា​ដាក់​ខ្សែបម្រើ​កណ្តាល​រូប​នេះ បូក​រួម​នឹង​ទឹកប្រាក់​មួយ​ចំនួន​ទៀត​ដើម្បី​ផ្ទេរ Jude Bellingham។

របាយ​ការណ៍​ដដែល​នេះ​ដែរ​បាន​បន្ថែម​ថា Real Madrid នឹង​មិន​ចំណាយ​ប្រាក់ 135 លានផោន ទៅ​លើ Bellingham នោះ​ឡើយ ព្រោះ​គេ​ទើប​តែ​បាន​ចាយប្រាក់​ប្រហែល 60 លានផោន ទៅ​លើ​ការ​ចុះ​ហត្ថលេខា​តារា​វ័យ 16 ឆ្នាំ Endrick ពី Palmeiras។ ប៉ុន្តែ​ពួក​គេ​ត្រៀម​ចំណាយ 100 លានអឺរ៉ូ (88 លានផោន) ហើយ​បូក​នឹង Camavinga ម្នាក់​ទៀត ដើម្បី​នាំ​យក​តារា​ឆ្នើម​សញ្ជាតិ​អង់គ្លេស​រូប​នេះ​មក​កាន់​ទឹកដី Santiago Bernabeu។

ប្រភព: Sportsmole