អតីត​ខ្សែការពារ​របស់​ក្លឹប​បិសាចក្រហម​ថា Rashford ស្ថិត​នៅ​កម្រិត​ស្មើ​គ្នា​ជាមួយ Harry Kane និង Salah

វីរ​បុរស​របស់​ក្លឹប​បិសាចក្រហម Manchester United លោក Wes Brown បាន​អះអាង​ថា ខ្សែ​ប្រយុទ្ធ Marcus Rashford ស្ថិត​នៅ​កម្រិត​ស្មើ​គ្នា​ជាមួយ Harry Kane និង Mohamed Salah ខណៈ​ដែល​ខ្សែ​ប្រយុទ្ធ​​សញ្ជាតិ​អង់គ្លេស​​កំពុង​​ត្រូវ​បាន​គេ​មើល​ឃើញ​​ថា ជា​ខ្សែ​ប្រយុទ្ធ​ដែល​ស្ថិត​ក្នុង​កម្រិត​កំពូល​មួយ​រូប​នៅ Premier League។

យ៉ាង​ណា​មិញ​រដូវកាល​នេះ Marcus Rashford បាន​ស៊ុតបញ្ចូល​ទី 17 គ្រាប់ និង Assists ចំនួន 6 ដង ក្នុង​ការ​បង្ហាញ​ខ្លួន 28 ប្រកួត​នៅ​គ្រប់​ព្រឹត្តិការណ៍​ប្រកួត​ប្រជែង​ទាំង​អស់​របស់​ក្លឹប។ គាត់​បាន​ស៊ុត​បញ្ចូល​ទី​សរុប​រហូត​ដល់ 111 គ្រាប់ និង Assists ចំនួន 63 ដង ក្នុង​ការ​បង្ហាញ​ខ្លួន 332 ប្រកួត រយៈ​ពេល 8 រដូវកាល​របស់​ខ្លួន​នៅ Old Trafford។

Marcus Rashford បាន​ក្លាយ​ជា​កីឡាករ​ដ៏​សំខាន់​បំផុត​ម្នាក់​សម្រាប់​ក្រុម​របស់​លោក Erik ten Hag ដែល​ដូចជា Harry Kane សំខាន់​សម្រាប់ Tottenham Hotspur និង Mohamed Salah សំខាន់​សម្រាប់ Liverpool អញ្ចឹង​ដែរ។ ទាំង​នេះ​បាន​ធ្វើ​ឲ្យ Wes Brown គិត​​ថា Marcus Rashford ស្ថិត​ក្នុង​កម្រិត​កំពូល ដែល​អាច​ប្រៀប​ប្រដូច​ទៅ Harry Kane និង Mohamed Salah បាន។

Wes Brown បាន​និយាយ​ទៅ​កាន់ Casinos En Ligne ថា៖ “Marcus Rashford គឺ​ជា​ថាមពល​មួយ​ដ៏​អស្ចារ្យ នៅ​ពេល​ដែល​គាត់​មាន​ទម្រង់​លេង​ល្អ។ គាត់​មើល​ទៅ​មុត​ស្រួច និង​មាន​ការ​ផ្តោត​អារម្មណ៍​ខ្ពស់ នោះ​ហើយ​ជា​ផ្នែក​ដែល​បាន​ជួយ​ដល់​គាត់។ នៅ​ពេល​គាត់​ព្យាយាម​ស៊ុត​បញ្ចូលទី គូ​ប្រជែង​ខ្លាច​គាត់ ហើយ​គាត់​ស្ថិត​ក្នុង​កម្រិត​ដូចគ្នា​ជា​មួយ Harry Kane និង Mohamed Salah។ គាត់​គ្រាន់​តែ​ត្រូវ​ការ​រក្សា​ទម្រង់​លេង​ដូច​បច្ចុប្បន្ន​គឺ​បាន​ហើយ”។

ប្រភព: Sportskeeda