Inter Milan សុំ​ឲ្យ Chelsea បញ្ចុះ​តម្លៃ​ផ្ទេរ Romelu Lukaku

ក្លឹប​យក្ស​របស់​អ៊ីតាលី Inter Milan ត្រូវ​បាន​គេ​រាយការណ៍​ថា កំពុង​តវ៉ា​នឹង​​លក្ខខណ្ឌ​ទិញ​ផ្ដាច់​កុងត្រា​សម្រាប់​ខ្សែ​ប្រយុទ្ធ Romelu Lukaku ជាមួយ​ក្លឹប​តោខៀវ Chelsea។ យ៉ាង​ណា​មិញ Romelu Lukaku គឺ​ជា​ខ្សែ​ប្រយុទ្ធ​ដែល​ផ្ទេរ​ពី Inter Milan ទៅ Stamford Bridge ក្នុង​តម្លៃ 97.5 លានផោន​កាល​ពី​ឆ្នាំ 2021។

ទោះ​ជា​យ៉ាង​ណា​ក៏​ដោយ​ក្នុង​រដូវកាល​ដំបូង​របស់​គាត់​នៅ​ទឹកដី​អង់គ្លេស​ជា​មួយ​ក្លឹប​តោខៀវ Chelsea គាត់​មាន​ទម្រង់​លេង​មិន​ល្អ​ឡើយ និង​មាន​ជម្លោះ​ផ្ទៃ​ក្នុង​ជា​មួយ​ក្លឹប​ថែម​ទៀត​ផង។ រដូវកាល​បន្ទាប់ Romelu Lukaku ត្រូវ​បាន​ក្លឹប​តោខៀវ​អនុញ្ញាត​ឲ្យ​គាត់​ខ្ចី​ជើង​ត្រឡប់​មក Inter Milan វិញ ជាមួយ​នឹង​លក្ខខណ្ឌ​ទិញ​ផ្ដាច់​កុងត្រា។

ការ​វិល​ត្រឡប់​មក​ក្របខណ្ឌ Serie A លើក​នេះ Romelu Lukaku មិន​សូវ​ជា​លេច​ធ្លោរ​ខ្លាំង​ដូច​កាល​ពី​មុន​ឡើយ និង​រង​របួស​ក្នុង​អំឡុង​ពេល​ពាក់កណ្តាល​រដូវកាល​ដំបូង​ថែម​ទៀត​ផង។ ទាំង​នេះ​បាន​ធ្វើ​ឲ្យ Inter Milan ហាក់​ដូច​ជា​រារែក​ក្នុង​ការ​ចុះ​ហត្ថលេខា​ផ្ដាច់​កុងត្រា​ជាមួយ​នឹង​ខ្សែ​ប្រយុទ្ធ​រូប​នេះ។

បន្ថែម​លើស​ពី​នេះ​ទៀត របាយការណ៍​ច្បាស់ការណ៍​ជា​ច្រើន​បានឲ្យ​ដឹង​ថា លក្ខខណ្ឌ​ហិរញ្ញ​វត្ថុ​របស់ Inter Milan នឹង​មិន​អាច​ធ្វើ​ឲ្យ​ពួក​គេ​ទិញ Romelu Lukaku ក្នុង​តម្លៃ​ខ្ពស់​បាន​ឡើយ។ ពួក​គេ​បាន​ព្យាយាម​ចរចា​ជាមួយ​ក្លឹប​តោខៀវ Chelsea លើ​តម្លៃ​ផ្ទេរ​កីឡាករ​សញ្ជាតិ​ប៊ែលហ្ស៊ិក​រូប​នេះ ហើយ​ប្រសិន​បើ​តម្លៃ​ផ្ទេរ​មិន​ត្រូវ​បាន​ថយ​ចុះ​ទេ​នោះ Inter Milan នឹង​ស្នើរ​ខ្ចី​ជើង Romelu Lukaku មួយ​រដូវកាល​បន្ថែម​ទៀត។

ប្រភព: Sportsmole