Lionel Messi នឹង​បង្ហាញ​ខ្លួន​ក្នុង​ជំនួប​ជា​មួយ Reims នៅ​រំលង​អាធ្រាត​នេះ

តារា​ឆ្នើម Lionel Messi ត្រូវ​បាន​គេ​រំពឹង​ថា នឹង​បង្ហាញ​ខ្លួន​ក្នុង​ជម្រើស 11 នាក់​ដំបូង​ក្នុង​ជំនួប​របស់ Paris Saint-Germain (PSG) ជួប​ជា​មួយ​នឹង​ក្លឹប Reims ក្នុង​ការ​ប្រកួត​ក្របខណ្ឌ Ligue 1 នៅ​ម៉ោង 2:45 នាទី រំលង​អាធ្រាត​នេះ (ម៉ោង​នៅ​កម្ពុជា)។ យ៉ាង​​ណា​មិញ​ក្លឹប​យក្ស​របស់​បារាំង PSG កំពុង​សម្លឹង​មើល​ជ័យ​ជំនះ​ក្នុង​ការ​ប្រកួត​នេះ​ផង​ដែរ បន្ទាប់​ពី​ការ​បរាជ័យ​របស់​ពួក​គេ​ក្រោម​ស្នាដៃ​ក្លឹប Rennes កាល​ពី​ប៉ុន្មាន​សប្តាហ៍​មុន។

ដោយ​ឡែក Lionel Messi បាន​សម្រាក​តាំង​ពី​ប្រកួត​មិត្តភាព​នៅ​ទឹកដី​អារ៉ាប៊ីសាអ៊ូឌីត​​មក​ម្ល៉េះ ដោយ​គាត់​មិន​បាន​បង្ហាញ​ខ្លួន​ក្នុង​ការ​ប្រកួត​ពាន​រង្វាន់ Coupe de France ឡើយ។ ទោះ​បី​ជា​យ៉ាង​នេះ​ក៏​ដោយ ក្រុម​របស់​លោក Christophe Galtier នៅ​តែ​អាច​ទទួល​បាន​ជ័យ​ជំនះ​ដ៏​ត្រចះត្រចង់ ក្នុង​ការ​យក​ឈ្នះ​ក្លឹប Pays de Cassel ជាមួយ​នឹង​លទ្ធផល 7-០ ខណៈ​ដែល Kylian Mbappe ស៊ុត​បាន 5 គ្រាប់​ម្នាក់​ឯង។

កាល​ពី​ម្សិលមិញ​នេះ​ក្លឹប Paris Saint-Germain បាន​ប្រកាស​បញ្ជី​ឈ្មោះ​កីឡាករ​ទាំង 21 នាក់​របស់​ខ្លួន​ហើយ សម្រាប់​ប្រកួត​ទល់​នឹង Reims ក្នុង​នោះ​ក៏​មាន​តារា​ឆ្នើម​ទាំង 3 របស់​ពួក​គេ​ផង​ដែរ​គឺ Lionel Messi, Kylian Mbappe និង Neymar Jr។ បច្ចុប្បន្ន PSG កំពុង​ឈរ​នៅ​ចំណាត់​ថ្នាក់​លេខ 1 របស់ Ligue 1 ប៉ុន្តែ​មាន​ពិន្ទុ​ដាច់​ពី​ក្រុម​លេខ 2 គឺ​ក្លឹប RC Lens ត្រឹម​តែ 2 ពិន្ទុ​ប៉ុណ្ណោះ។

ប្រភព: Sportskeeda