Inter Milan កំពុង​ចរចា​ខ្ចី​ជើង Harry Maguire ដើម្បី​យក​ទៅ​ជំនួស​កន្លែង​របស់ Milan Skriniar

ក្លឹប Inter Milan ត្រូវ​បាន​គេ​រាយការណ៍​មក​ថា បាន​ទាក់ទង​មក​កាន់​ក្លឹប​បិសាចក្រហម Manchester United ដើម្បី​ពិភាក្សា​អំពី​ការ​ខ្ចី​ជើង​ខ្សែការពារ Harry Maguire។ ដោយ​ឡែក​កាពីតែន​ក្រុម​របស់​ក្លឹប​បិសាចក្រហម​រូប​នេះ បាន​បាត់បង់​ឱកាស​ក្នុង​ការ​បង្ហាញ​ខ្លួន​ក្នុង​ជម្រើស​ដំបូង​នៅ Old Trafford បន្ទាប់​ពី​មាន​ទម្រង់​លេង​ធ្លាក់​ចុះ​ខ្លាំង។

ទោះ​បី​ជា Harry Maguire បាន​លេង 90 នាទី​ពេញនៃ​ការ​ប្រកួត​ថ្មីៗ​នេះ​ទល់នឹង Reading ក្នុង​ពាន​រង្វាន់ FA Cup កាល​ពី​ថ្ងៃសៅរ៍​សប្ដាហ៍​មុន​ពិត​មែន ប៉ុន្តែការ​ប្រកួត​ក្របខណ្ឌ Premier League រដូវកាល​នេះ​គាត់​បាន​បង្ហាញ​ខ្លួន​ក្នុង​ជម្រើស​ដំបូង​ត្រឹមតែ 4 ដង​ប៉ុណ្ណោះ។

ខ្សែការពារ Raphael Varane និង Lisandro Martinez បាន​ក្លាយ​ជា​ខ្សែការពារ​កណ្តាល​ក្នុង​ជម្រើស​ដំបូង​របស់​លោក Erik ten Hag ខណៈ​ដែល Victor Lindelof និង Luke Shaw ក៏​ជា​ជម្រើស​ដែល​មុន Harry Maguire ផងដែរ។

យោង​តាម​សារព័ត៌មាន Daily Mail បាន​ឲ្យ​ដឹង​ថា ក្លឹប​យក្ស​អ៊ីតាលី Inter Milan បាន​ទាក់ទង​មក​ក្លឹប​ម្ចាស់​ជើង​ឯក​អង់គ្លេស 20 សម័យ​កាល ដើម្បី​ពិភាក្សា​អំពី​លទ្ធភាព​នៃ​ការ​នាំយក​ខ្សែការពារ​សញ្ជាតិ​អង់គ្លេស ក្នុង​លក្ខខណ្ឌ​ខ្ចីជើង​រហូត​ដល់​ចុង​បញ្ចប់​នៃ​រដូវកាល​នេះ។ Inter Milan ពិត​ជា​ត្រូវ​ការ​ខ្សែការពារ​ចំណូល​ថ្មី​ម្នាក់​ជា​ចាំ​បាច់ ខណៈ​ដែល​ខ្សែការពារ​ឆ្នើម Milan Skriniar គ្រោង​នឹង​ផ្ទេរ​ទៅ​ចូលរួម​ជាមួយ Paris Saint-Germain ក្នុង​ពេល​ឆាប់ៗ​ខាង​មុខ​នេះ។

ប្រភព: Sportsmole