Bayern Munich ប្រកាស​ពី​ការ​ផ្ទេរ Joao Cancelo ក្នុង​លក្ខខណ្ឌ​ខ្ចី​ជើង​រហូត​ដល់​ចប់​រដូវកាល

កាល​ពី​ប៉ុន្មាន​ម៉ោង​មុន​នេះ​ក្លឹប​មេឃខៀវ Manchester City បាន​បញ្ជាក់​ពី​ការ​ចាក​ចេញ​របស់ Joao Cancelo ក្នុង​លក្ខខណ្ឌ​ខ្ចី​ជើង​ទៅ Bayern Munich រហូត​ដល់​ចុង​បញ្ចប់​នៃ​រដូវកាល​នេះ ខណៈ​ដែល​ក្លឹប​យក្ស​អាឡឺម៉ង់ ក៏​បាន​ប្រកាស​ពី​ការ​នាំ​យក​កីឡាករ​ចំណូល​ថ្មី​របស់​ខ្លួន គឺ​កីឡាករ​សញ្ជាតិ​ព័រទុយហ្គាល់រូប​នេះ​ដែរ។

យ៉ាង​ណា​មិញ​កីឡាករ​វ័យ 28 ឆ្នាំ​រូប​នេះ គឺ​ជា​តួអង្គ​ដ៏​សំខាន់​សម្រាប់​ក្រុម​របស់​លោក Pep Guardiola ដែល​មិន​មាន​នរណា​ម្នាក់​ធ្លាប់​គិត​ថា គាត់​អាច​នឹង​ចាកចេញ​ពី​ក្លឹប​ម្ចាស់​ជើង​ឯក​របស់​អង់គ្លេស​មួយ​នេះ​ឡើយ។ ក្នុង​រដូវកាល​ថ្មី​នេះ Joao Cancelo បាន​បង្ហាញ​ខ្លួន​ក្នុង​ជម្រើស 11 នាក់​ដំបូង​ចំនួន 16 ប្រកួត ក្នុង​ចំណោម 20 ប្រកួត​នៅ Premier League។

ទោះ​បី​ជា​យ៉ាង​ណា​ក៏​ដោយ ក្រោយ​ត្រឡប់​ពី​បំពេញ​ភារកិច្ច​នៅ World Cup វិញ ខ្សែការពារ​រូប​នេះ ហាក់​ដូច​ជា បាត់​បង់​ទំនុក​ចិត្ត​មួយ​ចំនួន​ពី​លោក Pep Guardiola ហើយ​ក៏​ធ្វើ​ឲ្យ Joao Cancelo សម្រេច​ចិត្ត​ចាកចេញ​ពី​ទឹកដី​អង់គ្លេស​ផង​ដែរ។ Joao Cancelo បាន​ផ្ទេរ​ចេញ​ក្នុង​កិច្ច​ព្រមព្រៀង​ខ្ចី​ជើង​ទៅ Bayern Munich តែ​មាន​លក្ខខណ្ឌ​ទិញ​ផ្ដាច់​កុងត្រា​នៅ​ចុង​បញ្ចប់​នៃ​រដូវ​កាលនេះ។ ដូចគ្នា​នេះ​ដែរ Joao Cancelo ​នឹង​ពាក់​អាវ​លេខ 22 នៅ​ក្លឹប​ថ្មី​របស់​ខ្លួន។

ប្រភព: Sportsmole