Connect with us

បាល់ទាត់អន្តរជាតិ

Achraf Hakimi អាច​នឹង​ខកខាន​ក្នុង​ការ​ប្រកួត​របស់ PSG ប៉ះ​នឹង Bayern Munich សប្ដាហ៍​ក្រោយ

Published

on

Achraf Hakimi ត្រូវ​បាន​គេ​រាយការណ៍​ថា បាន​ក្លាយ​ជា​កីឡាករ​ចុងក្រោយ​បង្អស់​ដែល​ស្ថិត​ក្នុង​បញ្ជី​របួស​របស់​ក្លឹប​យក្ស​បារាំង Paris Saint-Germain ដែល​របួស​នោះ​គឺ​ពាក់​ព័ន្ធ​នឹង​បញ្ហា​សរសៃពួរ។ កីឡាករ​សញ្ជាតិ​ម៉ារ៉ុក​រូប​នេះ គឺ​ជា​កីឡាករ​ឆ្នើម​ម្នាក់​របស់ PSG ក្នុង​រដូវកាល​ឆ្នាំ 2022-2023 នេះ ដោយ​ស៊ុត​បញ្ចូលទី​បាន 4 គ្រាប់ និង Assists បាន 5 ដង ក្នុង​ការ​បង្ហាញ​ខ្លួន 29 ប្រកួត។

កីឡាករ​វ័យ 24 ឆ្នាំ​រូប​នេះ បាន​ក្លាយ​ជា​ផ្នែក​មួយ​ដ៏​សំខាន់​នៅតំបន់​ការពារ​ស្តាំ​របស់ PSG ចាប់​តាំង​ពី​បាន​ផ្ទេរ​ពី Inter Milan នៅ​រដូវក្តៅ​ឆ្នាំ 2021 ហើយ​គាត់​ថែម​ទាំង​បាន​រួម​ចំណែក​រក​បាន 1 គ្រាប់ និង​បញ្ជូនបាល់​ឲ្យ​ Lionel Messi បាន​ម្ដង​ផង​ដែរ ក្នុង​ជ័យ​ជម្នះ 2-1 នៅ​ក្នុង​ការ​ប្រកួត Ligue 1 កាល​ពី​ចុងសប្តាហ៍​មុន​លើ​ក្រុម Toulouse។

ដោយ​ឡែក Achraf Hakimi បាន​លេង​ពេញ 90 នាទី ខណៈ​ដែល PSG បាន​ចាញ់​ក្នុង​លទ្ធផល 2-1 ក្រោម​ស្នាដៃ​ក្រុម Marseille ក្នុង​ការ​ប្រកួត Coupe de France វគ្គ 16 ក្រុម​ចុង​ក្រោយ​កាល​ពី​ថ្ងៃ​ពុធ​កន្លង​ទៅ ខណៈ​ដែល​ប្រកួត​បន្ទាប់​នឹង​ត្រូវ​ប៉ះ Monaco ក្នុង​ក្រប​ខ័ណ្ឌ​កំពូល Ligue 1។

ទោះ​បី​ជា​យ៉ាងណា​ក៏ដោយ យោងតាម​ការ​អះអាង​របស់ L’Equipe បាន​ឲ្យ​ដឹង​ថា Hakimi មាន​បញ្ហា​សរសៃ​ពួរ​ពេល​ប្រកួត​ជាមួយ Marseille កាល​ពី​ប៉ុន្មាន​ថ្ងៃ​មុន​នេះ ហើយ​បច្ចុប្បន្ន​កំពុង​មាន​ការ​សង្ស័យ​ថា គាត់​នឹង​ខកខាន​ការ​ប្រកួត​នៅ​ចុង​សប្តាហ៍​នេះ​ដែល​ត្រូវ​ប៉ះ Monaco។ លើស​ពី​នេះ​ដែរ Achraf Hakimi ក៏​អាច​នឹង​មិន​បាន​លេង​ក្នុង​ការ​ប្រកួត​ជើង​ទី​មួយ​នៃ​ការ​ប្រកួត​ក្របខ័ណ្ឌ UEFA Champions League វគ្គ 16 ក្រុម​ចុងក្រោយ​របស់ PSG ជាមួយ​នឹង Bayern Munich ដែល​ធ្វើ​ឡើង​នៅ​កីឡដ្ឋាន Parc des Princes នៅ​ថ្ងៃ​អង្គារ​សប្ដាហ៍​ក្រោយ។

ប្រភព: Sportsmole

Trending

© រក្សា​សិទ្ធិ​គ្រប់​យ៉ាង​ដោយ​ X-SPORT ឆ្នាំ​ ២០២២