Manchester City រក​ឃើញ​បេក្ខភាព​ខ្សែការពារ​ថ្មី ដើម្បី​ជំនួស​កន្លែងរ​បស់ Joao Cancelo

ក្លឹប​មេឃខៀវ Manchester City កំពុង​មាន​ការ​ចាប់​អារម្មណ៍​យ៉ាង​ខ្លាំង​ចំពោះ​កីឡាករ Federico Dimarco របស់​ក្លឹប Inter Milan ក្នុង​អំឡុង​ពេល​ដែល​ពួក​គេ​កំពុង​ស្វែងរក​ខ្សែការពារ​ឆ្វេង​ចំណូល​ថ្មី ដើម្បី​ជំនួស​កន្លែង​របស់ Joao Cancelo។

យ៉ាង​ណា​មិញ​កីឡាករ​សញ្ជាតិ​អ៊ីតាលី​រូប​នេះ​បាន​ក្លាយ​ជា​កីឡាករ​ឆ្នើម​ម្នាក់​របស់ Inter Milan ក្នុង​អំឡុង​រដូវកាល​ឆ្នាំ 2022-2023 នេះ។ ទម្រង់​លេង​ដ៏​អស្ចារ្យ​របស់​កីឡាករ​វ័យ 25 ឆ្នាំ​រូប​នេះធ្វើ​ឲ្យ​គាត់​​ដណ្ដើម​កៅអី​ជម្រើស 11 នាក់​ដំបូង​របស់ Robin Gosens ថែម​ទៀត​ផង។

សម្រាប់​សមត្ថភាព​ក្នុង​ការ​បញ្ជូន​បាល់​ចូល​ទៅ​ក្នុង​ប្រអប់​គ្រោះថ្នាក់ និង​អាច​លេង​ជា​ខ្សែការពារ​កណ្ដាល​ផង​នោះ គឺ​ជា​មូលហេតុ​សំខាន់​មួយ​ដែល Manchester City ព្យាយាម​នាំ​យក​គាត់​ទៅ Etihad Stadium នៅ​ចុង​បញ្ចប់​នៃ​រដូវកាល​នេះ។

ប្រភព​ពី​គេហទំព័រ 90min.com បាន​បញ្ជាក់​ថា Federico Dimarco គឺ​ជា​កីឡាករ​ម្នាក់​ក្នុង​ចំណោម​កីឡាករ​មួយ​ចំនួន​ទៀត​ដែល Inter Milan នឹង​ពិចារណា​លក់​នៅ​រដូវក្តៅ​នេះ ហើយ​តម្លៃ​ផ្ទេរ​របស់​គាត់​ប្រហែល​ជា 40 លានផោន។ ដូចគ្នា​នេះ​ដែរ Joao Cancelo ត្រូវ​បាន​គេ​ដឹង​ថា ប្រហែល​ជា​នឹង​មិន​ត្រឡប់​មក Manchester City វិញ​ឡើយ បើ​ទោះ​បី​ជា​គាត់​ចប់​ភារកិច្ច​ខ្ចី​ជើង​នៅ Bayern Munich ក៏​ដោយ។ ដូច្នេះ Federico Dimarco ជា​បេក្ខភាព​ដ៏​សាកសម​បំផុត​ដើម្បី​ជំនួស​តួនាទី​របស់​កីឡាករ​សញ្ជាតិ​ព័រទុយហ្គាល់​រូប​នេះ។

ប្រភព: 90 Min