ឃើញ​ឡើង​ជើង​ខ្លាំង Real Madrid ចង់​បន្ត​​កុងត្រា​ថ្មី​រយៈពេល​វែង​ដល់ Brahim Diaz

ក្លឹប Real Madrid ត្រូវ​បាន​គេ​រាយការណ៍​ថា ចង់​ចង​ជើង​ខ្សែ​ប្រយុទ្ធ​សញ្ជាតិ​អេស្ប៉ាញ Brahim Diaz ដោយ​ការ​ចុះ​ហត្ថលេខា​លើ​កុងត្រា​ថ្មី​រយៈពេល​វែង។ កីឡាករ​វ័យ 23 ឆ្នាំ​រូប​បច្ចុប្បន្ន​កំពុង​​លេង​ក្នុង​លក្ខខណ្ឌ​ខ្ចី​ជើង​នៅ AC Milan រយៈ​ពេល 2 ឆ្នាំ​កន្លះ​មក​ហើយ និង​ធ្លាប់​បាន​​ឈ្នះ​ពាន Serie A កាល​ពី​រដូវ​កាល​មុន​ផង​ដែរ។

Brahim Diaz នៅ​តែ​ជា​កីឡាករ​ដ៏​សំខាន់ និង​បង្ហាញ​ខ្លួន​គ្រប់​ការ​ប្រកួត​ក្រោម​ការ​ដឹនាំ​របស់​លោក Stefano Pioli ក្នុង​រដូវកាល​​ឆ្នាំ 2022-2023 នេះ ដោយ​បាន​ស៊ុត​បញ្ចូល​ទី​ចំនួន 5 គ្រាប់ និង Assist បាន 2 លើក ពី​ការ​បង្ហាញ​ខ្លួន​ចំនួន 26 ប្រកួត។

កីឡាករ​រូប​នេះ​គ្រោង​នឹង​ត្រឡប់​ទៅ Real Madrid វិញ​នៅ​ចុង​បញ្ចប់​នៃ​រដូវកាល​នេះ បើ​ទោះបី​ជា AC Milan មាន​ជម្រើស​ក្នុង​ការ​ទិញ​ផ្ដាច់​កុងត្រា​គាត់​ក៏​ដោយ។ Brahim Diaz នៅ​មាន​កុងត្រា​ជាមួយ Real Madrid រហូត​ដល់​ឆ្នាំ 2025 ប៉ុន្តែ​យោង​ទៅ​តាម​របាយការណ៍​ពី Relevo បាន​ឲ្យ​ដឹង​ថា ក្រុម​របស់​លោក Carlo Ancelotti ចង់​ចរចា​លើ​កុងត្រា​ថ្មី​បន្ត​លើ​កុងត្រា​បច្ចុប្បន្ន​របស់​គេ​ជាមួយ​នឹង​លក្ខខណ្ឌ​ថ្មី ដែល​មាន​សុពលភាព​រហូត​ដល់​ឆ្នាំ 2027។

ប្រភព: Sportsmole