កីឡាករ 4 រូប​ដែល​មិន​ចង់​ឲ្យ Messi ត្រឡប់​មក Barcelona វិញ

យោងតាម​របាយការណ៍​ពី El Nacional បាន​រាយការណ៍​ថា កីឡាករ​សញ្ជាតិ​ប៉ូឡូញ Robert Lewandowski គឺ​ជា​កីឡាករ​ម្នាក់ ក្នុង​ចំណោម​កីឡាករ 3 នាក់​ផ្សេង​ទៀត ដែល​ប្រឆាំង​នឹង​ការ​វិល​ត្រឡប់​មក​វិញ​របស់ Lionel Messi ខណៈ​ដែល​គាត់​ត្រូវ​បាន​គេ​គិត​ថា ចង់​បន្ត​ស្ថានភាព​បច្ចុប្បន្ន​ដែល​ខ្លួន​គឺ​ជា​តួ​ឯក​របស់​ក្លឹប។

ទន្ទឹម​នឹង​នេះ​ដែរ អ្នកចាំទី Marc-Andre ter Stegen ក៏​មិន​ចង់​ឲ្យ​អតីត​មិត្ត​រួម​ក្រុម​របស់​គាត់ត្រឡប់​មក​វិញដែរ។ ទំនាក់​ទំនង​របស់​កីឡាករ​សញ្ជាតិ​អាឡឺម៉ង់​រូប​នេះ ជាមួយ​ខ្សែប្រយុទ្ធ Lionel Messi មិនសូវ​ល្អ​ឡើយ។ គាត់​ធ្លាប់​បាន​ស្តី​បន្ទោស Messi ជុំវិញ​អាកប្បកិរិយា​មិន​ល្អ ក្នុង​ការ​ហ្វឹកហាត់ ហើយ​អ្នក​ទាំង 2 មិន​សូវ​បាន​និយាយ​ស្ដី​ជាមួយ​គ្នា​ឡើយ។

Ansu Fati ក៏​ជា​កីឡាករ​ម្នាក់​ទៀត​ដែល​ត្រូវ​បាន​គេរាយការណ៍​ថា ប្រឆាំង​នឹង​ការ​នាំ​យក Messi ត្រលប់​មក​វិញ​ដែរ។ ការ​ច្រណែន ជា​បញ្ហា​រវាង​អ្នក​ទាំង 2 ដោយ Fati ខ្លាច Messi ចូល​មក​ជំនួស​តួនាទី​របស់​គេ​នៅ​ក្នុង​​ក្រុម។ បច្ចុប្បន្ន​​គាត់​បាន​ពាក់អាវ​លេខ 10 ដែល​ជា​របស់ Lionel Messi ហើយ​ច្បាស់​ណាស់​ថា ប្រសិន​បើ​កីឡាករ​អាហ្សង់ទីន​រូប​នេះ​ត្រឡប់​មក​វិញ គាត់​នឹង​ប្រើប្រាស់​អាវ​លេ​ខ 10 របស់​ខ្លួន​វិញ។

ចុងក្រោយ​គឺ Ousmane Dembele ក៏​ជា​អ្នក​ដែល​ជំទាស់​នឹង​ការ​វិល​ត្រឡប់​របស់ Messi ផងដែរ ដោយ​សារ​តែ​អ្នក​ទាំង 2 មិន​សូវ​មាន​ភាព​ស្និទស្នាល និង​លេង​មិន​សូវ​ស៊ី​ចង្វាក់​គ្នា​ឡើយ​ពេល​នៅ Barcelona។ ខ្សែ​ប្រយុទ្ធ​​ស្លាប​សញ្ជាតិ​បារាំង​រូប​នេះ​បាន​រង​របួស​ជា​ញឹក​ញាប់ អំឡុង​​ពេល Messi នៅ ប៉ុន្តែ​បច្ចុប្បន្ន​គាត់​កំពុង​តែ​រីករាយ​ជា​មួយ​នឹង​ទម្រង់​លេង​ដ៏​លេច​ធ្លោរ ក្រោម​ការ​ដឹកនាំ​របស់​លោក Xavier Hernandez ក្នុង​​រដូវ​កាល​​នេះ។

ប្រភព: Sportskeeda