លោក Xavi Hernandez កំពុង​កំណត់​គោលដៅ ទិញ​យក​កីឡាករ​បន្ថែម​ទៀត​នៅ​រដូវ​ក្ដៅ​នេះ បន្ទាប់​ពី​ឃើញ​កំហុសឆ្គង​ខ្លាំង​នៅ Europa League

អ្នកចាត់ការ​ទូទៅ​របស់​ក្លឹប Barcelona លោក Xavi Hernandez កំពុង​កំណត់គោល​ដៅ​ចុះហត្ថលេខា​​នាំ​យក​កីឡាករ​ថ្មីៗ​បន្ថែមទៀត​នៅ​ក្នុង​រដូវក្តៅនេះ បន្ទាប់​ពី​មើល​ឃើញ​ពី​ភាព​ទន់​ខ្សោយ​នៃ​ក្រុម​របស់​លោក ដែល​សូម្បី​តែ Europa League ក៏​មិន​អាច​ប្រកួត​ប្រជែង​បាន។

ក្លឹប​អ្នក​មាន​បុណ្យ Barcelona ស្ទើរ​តែ​អាច​ឈាន​ដល់​វគ្គ​បួន​ក្រុម​ចុង​ក្រោយ​ទៅ​ហើយ ប៉ុន្តែ​ត្រូវ​បាន​ធ្លាក់ចេញ​ពី Europa League ក្រោម​ថ្វី​ជើង​របស់ Frankfurt ក្នុង​លទ្ធផល​សរុបទាំង​ពីរ​ជើង 4-3។

ទោះ​បី​ជា​មាន​វត្តមាន​របស់​លោក Xavi Hernandez មក​ធ្វើ​ជា​អ្នក​ចាត់​ការ​ថ្មី​ក៏​ដោយ ក្លឹប Barcelona បាន​ត្រឹម​តែ​ប្រសើរ​ជាង​មុន ហើយ​នៅ​មាន​ចំណុច​ខ្វះ​ខាត​បន្ថែម​ទៀត ទាំង​នៅ​តំបន់​ការពារ និង​តំបន់​ប្រយុទ្ធ ខណៈ​ដែល​ពួក​គេ​ហាក់​ដូច​មិនទាន់​អាច​មាន​សមត្ថភាព​គ្រប់គ្រាន់​ដើម្បី​ប្រជែង​ពានធំៗ​បាន​នៅ​ឡើយ​ទេ។

ទោះបីជា Andreas Christensen និង Franck Kessie គ្រោង​នឹង​ចុះហត្ថលេខា​មក​ក្លឹប Barcelona ក៏​ដោយ លោក Xavi Hernandez នៅ​តែ​ទាម​ទារ​ក្លឹប​ឲ្យ​ព្យាយាម​នាំ​យក​កីឡាករ​បន្ថែម​ទៀត​នៅ​រដូវក្ដៅ​នេះ ដើម្បី​អាច​មាន​លទ្ធភាព​គ្រប់គ្រាន់​ដើម្បី​ប្រជែងពាន​ក្នុង​ប្រទេស និង​ពាន​នៅ​តំបន់​អ៊ឺរ៉ុប។

ប្រភព: 90 Min