កូនស្រី​របស់ Pele បង្ហើ​ប​ថា មុន​ទទួល​មរណៈភាព ឪពុក​របស់​នាង​​មាន​បំណង​ចង់​ឲ្យ Messi ឈ្នះពាន World Cup

មុន​ទទួល​មរណភាព កីឡាករ​បាល់ទាត់​ដ៏​ល្បីល្បាញ​របស់​ប្រេស៊ីល Pele ធ្លាប់​មាន​បំណង​ចង់​ឲ្យ​អាហ្សង់ទីន​ឈ្នះពាន​រង្វាន់ FIFA World Cup ឆ្នាំ 2022 ដែល​ពិសេសេ គឺ​សម្រាប់ Lionel Messi។ រឿង​នេះ​ត្រូវ​បាន​បង្ហាញ​ដោយ​កូន​ស្រី​របស់​គាត់ Kely Nascimento។ ដោយ​ឡែក Pele បាន​ទទួល​មរណភាព​នៅ​ថ្ងៃទី 29 ខែ ធ្នូ ឆ្នាំ 2022 ត្រឹមតែ​ជាង​មួយ​សប្តាហ៍​បន្ទាប់​ពី​ក្រុម​ពពកស​អាហ្សង់ទីន​បាន​លើក​ពាន World Cup។

យ៉ាង​ណា​មិញ​ថ្មីៗ​នេះ​កូន​ស្រី​របស់ Pele ត្រូវ​បាន​ទទួល​ការ​អញ្ជើញ​ឲ្យ​ចូលរួម​​ពិធី​ប្រគល់ពាន​រង្វាន់ FIFA The Best 2022 ដែល​ជា​ការ​ប្រកាស​ឈ្មោះ​កីឡាករ​ឆ្នើម​ប្រចាំ​ឆ្នាំ។ នាង​បាន​ជួប​ប្រពន្ធ​របស់ Messi គឺ​អ្នក​នាង Antonela Roccuzzo នៅ​ឯ​ពិធី​ជប់​លៀង​នោះ ហើយ​បាន​ប្រាប់​ពី​មូលហេតុ​ដែល Pele ឪពុក​របស់​ខ្លួន​ចង់​ឲ្យ អាហ្សង់ទីន​ដែល​ជា​សត្រូវ​ដ៏​ធំ​របស់​ប្រេស៊ីល​នៅ​ក្នុង​ពិភព​បាល់ទាត់​ឈ្នះពាន World Cup។

Kely Nascimento ដែល​ជា​កូនស្រី​របស់ Pele បាន​លើក​ឡើង​ថា៖ “បន្ទាប់​ពី​ប្រេស៊ីល​បាន​ធ្លាក់​ចេញ​ពី​ការ​ប្រកួត អ្នក​រាល់​គ្នា​ដែល​ចូល​មក​ក្នុង​បន្ទប់​មន្ទីរ​ពេទ្យ​របស់​គាត់ (Pele) សួរ​គាត់​ថា ឥឡូវ​តើ​អ្នក​ចង់​ឲ្យ​នរណា​ឈ្នះ​ពាន​នេះ? ច្បាស់​ជា​មិនមែន​អាហ្សង់ទីន​ទេ?”។ ពេល​នោះ​ឪពុក​របស់​នាង​បាន​តប​ថា៖ “បាទ!!! អាហ្សង់ទីន… ពាន​​ត្រូវ​ត្រឡប់​ទៅ​អាមេរិក​ខាង​ត្បូង​វិញ ហើយ Messi ត្រូវ​តែ​ឈ្នះ។… Messi នឹង​ឈ្នះ”។

ប្រភព: Sportskeeda