Real Madrid ដាក់​គោលដៅ​លើ​កីឡាករ 2 រូប​នេះ ជា​កីឡាករ​ដែល​ត្រូវ​ផ្ទេរ​នៅ​ចុង​បញ្ចប់​នៃ​រដូវកាល

ក្លឹប​អធិរាជ​ស Real Madrid ត្រូវ​បាន​គេ​រាយការណ៍​ថា បាន​កំណត់​គោលដៅ​លើ Jude Bellingham របស់ Borussia Dortmund និង Josko Gvardiol របស់ RB Leipzig ជា​គោលដៅ​ផ្ទេរ​ដ៏​សំខាន់​មួយ​របស់​ពួកគេ​នៅ​ក្នុង​ទីផ្សារ​ដោះដូរ​កីឡាករ​នា​រដូវក្តៅ​ឆាប់ៗ​ខាង​មុខ​នេះ។

យ៉ាង​ណា​មិញ Bellingham បច្ចុប្បន្ន​បាន​ក្លាយ​ជា​ខ្សែបម្រើ​ម្នាក់ ក្នុង​ចំណោម​ខ្សែបម្រើ​ដែល​ក្លឹប​ធំៗ​ជា​ច្រើន​ចង់​បាន​បំផុត​នៅ​មុន​រដូវកាល 2023-2024 ហើយ Real Madrid ក៏​ជា​ក្លឹប​ដែល​ចង់​ចុះ​ហត្ថលេខា​លើ​គាត់​ផង​ដែរ។ កីឡាករ​វ័យ 19 ឆ្នាំ​ ដែល​ស្ថិត​ក្នុង​រ៉ាដា​របស់ Liverpool, Manchester City, Manchester United និង Chelsea មាន​ទម្រង់​លេង​ដ៏​លេច​ធ្លោរ​បំផុត ក្នុង​រយៈពេល 3 ឆ្នាំ​នៅ​ប្រទេស​អាឡឺម៉ង់ ដោយ​ស៊ុតបញ្ចូលទី​បាន 20 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន 24 ដង ក្នុង​ការ​បង្ហាញ​ខ្លួន 120 ប្រកួត។

ដូចគ្នា​នេះ​ដែរ ខ្សែការពារ Josko Gvardiol ដែល​ជា​មិត្ត​រួម​ក្រុម​ជម្រើស​ជាតិ​ជាមួយ Luka Modric ក៏​ជា​កីឡាករ​ដែល​ក្លឹប​ធំៗ​ជា​ច្រើន​ចាប់​អារម្មណ៍​ខ្លាំង​ដូច​ទៅ​នឹង Bellingham ដែរ។ ខ្សែការពារ​វ័យ 21 ឆ្នាំ​រូប​នេះ គឺ​ជា​រនាំង​ការពារ​ដ៏​សំខាន់​បំផុត​របស់​ក្លឹប​ច្ចុប្បន្ន RB Leipzig ហើយ​អ្វី​ដែល​កាន់​តែ​ពិសេស​ទៀត​នោះ កីឡាករ​វ័យ​ក្មេង​រូប​នេះ​បាន​បង្ហាញ​ខ្លួន​យ៉ាង​លេច​ធ្លោរ​ជាមួយ​ក្រុម​ជម្រើស​ជាតិ​ក្រូអាត​នៅ​ក្នុង​ព្រឹត្តិការណ៍​នៃ​ការ​ប្រកួត World Cup 2022 កាល​ពី​ចុង​ឆ្នាំ​មុន។

យោងតាម​របាយការណ៍​ពី Sport បាន​ឲ្យ​ដឹង​ថា ក្លឹប Real Madrid គ្រោង​នឹង​លូក​ដៃ​ចូល​ក្នុង​ទីផ្សារ​ដោះដូរ​កីឡាករ​នា​ចុង​រដូវកាល​នេះ។ ប្រធាន​ក្លឹប​លោក Florentino Perez សង្ឃឹម​ថា នឹង​អាច​នាំ​យក​កីឡាករ​ចំណូល​ថ្មី​ដែល​មាន​គុណភាព​ដើម្បី​ពង្រឹង​ក្រុម​របស់​លោក Carlo Ancelotti ជាមួយ​នឹង​ការ​ចុះហត្ថលេខា​លើ Bellingham និង​ខ្សែការពារ Gvardiol។

ប្រភព: Sportsmole