ប្រកួត​ប៉ះ Nantes យប់​នេះ PSG ដាក់​កីឡាករ​លេង​ពេញ​សាច់ ខណៈ​ដែល 4 ថ្ងៃ​បន្ទាប់​ត្រូវ​ជួប Bayern Munich

នៅ​ម៉ោង 3 រំលង​អាធ្រាត​នេះ ក្លឹប​យក្ស​បារាំង Paris Saint-Germain នឹង​ត្រូវ​ធ្វើ​ការ​ប្រកួត​ដោយ​ទទួល​ស្វាគមន៍​​ក្រុម​ភ្ញៀវ Nantes ដែល​ជា​ការ​ប្រកួត​សន្សំ​ពិន្ទុ​នៅ Ligue 1។ ដោយ​ឡែក PSG បាន​បញ្ចេញ​នូវ​បញ្ជី​ឈ្មោះ​កីឡាករ​របស់​ខ្លួន​ហើយ ដោយ​កីឡាករ​សំខាន់ៗ​ក៏​មាន​វត្តមាន​ផង​ដែរ លើក​លែង​តែ Neymar ប៉ុណ្ណោះ​ដែល​កំពុង​មាន​របួស។

យ៉ាង​ណា​មិញ​ក្រុម​របស់​លោក Christophe Galtier ប្រហែល​ជា​នឹង​ប្រើប្រាស់​ទម្រង់​លេង 3-5-2 ដែល​ខ្សែ​ប្រយុទ្ធ 2 រូប​ខាង​លើ​មាន Kylian Mbappe ចាប់​ដៃ​គូ​គ្នា​ជាមួយ​តារា​ឆ្នើម​អាហ្សង់ទីន Lionel Messi។ ថ្វី​ត្បិតតែ​បច្ចុប្បន្ន​ពួក​គេ​កំពុង​ឈរ​នៅ​កំពូល​តារាង​ពិត​មែន ប៉ុន្តែ PSG នឹង​ត្រូវ​ការ 3 ពិន្ទុ​ថែម​ទៀត​ជា​ចាំ​បាច់ ដើម្បី​រក្សា​គម្រាត​ពី​ក្រុម​លេខ 2 Marseille ឲ្យ​បាន 11 ពិន្ទុ។

នៅ​ប្រកួត​បន្ទាប់​ថ្ងៃ​ទី 09 ខែ​មីនា ខាង​មុខ​នេះ Paris Saint-Germain នឹង​ត្រូវ​តតាំង​ជាមួយ​ក្រុម​ខ្លាំង Bayern Munich ដែល​ជា​ការ​ប្រកួត​ជើង 2 វគ្គ 16 ក្រុម​ចុង​ក្រោយ​នៃ​ក្រប​ខណ្ឌ UEFA Champions League។ ក្លឹប​ម្ចាស់​ជើង​ឯក​របស់​បារាំង​នឹង​ត្រូវ​ធ្វើ​ការ​ធ្ងន់ ដោយ​សារ​ពួក​គេ​បាន​ចាញ់ 1-0 កាល​ពី​ការ​ប្រកួត​ជើង​ទី 1។ លើស​ពី​នេះ​ទៅ​ទៀត ខ្សែ​ប្រយុទ្ធ​ឆ្នើម​សញ្ជាតិ​ប្រេស៊ីល Neymar Jr នឹង​ត្រូវ​ខកខាន​ការ​ប្រកួត​នោះ​ផង​ដែរ។

ប្រភព: PSG – Paris Saint-Germain