ប្រធាន​ក្លឹប Barcelona គ្រោង​បន្ត​កុងត្រា​ថ្មី​ដល់​គ្រូ​បង្វឹក​លោក Xavi Hernandez

ប្រធាន​ក្លឹប​អ្នក​មាន​បុណ្យ Barcelona លោក Joan Laporta បាន​បង្ហើប​ថា ក្លឹប​របស់​លោក​បាន​ត្រៀម​ខ្លួន​ជា​ស្រេច​ក្នុង​ការ​ផ្តល់​ជូន​នូវ​កុងត្រា​ថ្មី​បន្ថែម​ទៀត​សម្រាប់​គ្រូ​បង្វឹក​លោក Xavi Hernandez។ យ៉ាង​ណា​មិញ កាល​នៅ​ជា​កីឡាករ Xavi បាន​បង្ហាញ​ខ្លួន​ចំនួន 767 ប្រកួត​សម្រាប់​ក្លឹប​យក្ស​កាតាឡាន់​មួយ​នេះ ដោយ​ស៊ុត​បញ្ចូលទី​បាន 85 គ្រាប់ និង Assists បាន​ចំនួន 184 ដង។

Xavi Hernandez បាន​ចាប់​ផ្តើម​អាជីព​ជា​គ្រូ​បង្វឹក​របស់​គាត់​ជាមួយ​ក្លឹប Al-Sadd ហើយ​ក្នុង​អំឡុង​ពេល 2 ឆ្នាំ​ចន្លោះ​ឆ្នាំ 2019 និង 2021 នោះ គាត់​បាន​ឈ្នះពាន​រង្វាន់​សរុប​ចំនួន 7 ពាន។ នៅ​ខែ​វិច្ឆិកា ឆ្នាំ 2021 Xavi បាន​ត្រឡប់​មក Camp Nou វិញ​ដោយ​ជំនួស​តំណែង​របស់​លោក Ronald Koeman នៅ​ក្លឹប Barcelona។

លោក Xavi Hernandez បាន​ស្ដារ​ស្ថានភាព​ដែល​ក្លឹប​កំពុង​តែ​ដុន​ដាប​ខ្លាំងឲ្យប្រសើរ​ឡើង និង​កំពុង​សម្លឹង​មើល​ឱកាស​ក្នុង​ការ​លើក​ពាន​រដូវកាល​នេះ​ទៀត​ផង។ ទោះ​បី​ជា Barcelona បាន​ធ្លាក់​ចេញ​ពី UEFA Champions League និង Europa League ក្នុង​រដូវកាល​នេះ​ក៏​ដោយ ប៉ុន្តែ​ពួកគេ​បាន​ទទួល​ជោគជ័យ​យ៉ាង​ខ្លាំង​ក្នុង​ការ​ប្រកួត​ប្រជែង​នៅ​លីគ​កំពូល។

ពួក​គេ​​ក៏​បាន​ឈ្នះ​ពាន Spanish Super Cup កាល​ពី​ដើម​ឆ្នាំ​នេះ និង​កំពុង​ត្រៀម​ឆក់​យក​ពាន Copa del Rey ផង​ដែរ បន្ទាប់​ពី​ការ​ប្រកួត​ជើង​ទីមួយ​វគ្គ​ពាក់​កណ្តាល​ផ្តាច់​ព្រ័ត្រ ដែល​បាន​ឈ្នះ 1-0 ទៅ​លើ Real Madrid។

ជាមួយ​គ្នា​នេះ​ដែរ កុងត្រា​បច្ចុប្បន្ន​របស់​លោក Xavi Hernandez នឹង​ត្រូវ​ផុត​កំណត់​នៅ​ខែ​មិថុនា ឆ្នាំ 2024 ឆ្នាំ​ក្រោយ​នេះ​ហើយ។ យ៉ាង​ណា​ប្រធាន​ក្លឹប​លោក Joan Laporta បាន​បង្ហាញ​ថា ក្លឹប​នឹង​ព្រម​ព្រៀង​កុងត្រា​ថ្មី​បន្ថែម​ទៀត​លើ​បុរស​វ័យ 43 ឆ្នាំ​រូប​នេះ។ Joan Laporta បាន​បន្ថែម​ទៀត​ថា គ្រូ​បង្វឹក​រូប​នេះ​គឺ​ជា​មនុស្ស​ម្នាក់ ដែល​ស្គាល់​​ក្លឹប និង​យល់​ច្បាស់​ពី​ទម្រង់​លេង​ពិត​ប្រាកដ​របស់ Barcelona។

ប្រភព: Sportsmole