ប្រធាន​ក្លឹប Barcelona គ្រោង​បន្ត​កុងត្រា​ថ្មី​ដល់ Sergio Busquets

ប្រធាន​ក្លឹប​អ្នក​មាន​បុណ្យ Barcelona លោក Joan Laporta បាន​បញ្ជាក់​ថា ក្លឹប​កំពុង​រៀបចំ​ការ​ផ្តល់​ជូន Sergio Busquets នូវ​កុងត្រា​ថ្មី ដើម្បី​ឲ្យ​ខ្សែបម្រើ​រូប​នេះ​បន្ត​ស្នាក់​នៅ Camp Nou រហូត​ដល់​រដូវ​ក្តៅ​ឆ្នាំ 2024។

យ៉ាង​ណា​មិញ កុងត្រា​​ដែល​មាន​ស្រាប់​របស់​កីឡាករ​វ័យ 34 ឆ្នាំ​រូប​នេះ ជាមួយ​ក្លឹប​យក្ស​កាតាឡាន់ នឹង​ត្រូវ​ផុត​កំណត់​នៅ​ចុង​បញ្ចប់​នៃ​រដូវ​កាល​នេះ ហើយ​អនាគត​របស់​គាត់​នៅ​តែ​មិន​ទាន់​ច្បាស់​លាស់​ឡើយ។ Busquets នៅ​តែ​ត្រូវ​បាន​គេ​មើល​ឃើញ​ថា ជា​កីឡាករ​ដ៏​សំខាន់​សម្រាប់ Barcelona នៅ​ឆ្នាំ 2022-2023 នេះ ដោយ​បង្ហាញ​ខ្លួន​ចំនួន 31 ប្រកួត។

ក្លឹប Inter Miami របស់ MLS ត្រូវ​បាន​គេ​ជឿ​ថា ចង់​ចុះ​ហត្ថលេខា​លើ​ Busquets នៅ​រដូវក្តៅ​នេះ ខណៈ​ដែល​ក្លឹប​អារ៉ាប៊ីសាអូឌីត​មួយ​ចំនួន​ក៏​ចង់​បាន​ខ្សែបម្រើ​សញ្ជាតិ​អេស្ប៉ាញ​រូប​នេះ​ដែរ ប្រសិន​បើ​គាត់​សម្រេច​ចិត្ត​ចាកចេញ​ពី​ក្លឹប Barcelona។

របាយការណ៍​ថ្មីៗ​នេះ​បាន​អះអាង​ថា Busquets បាន​ជូន​ដំណឹង​ដល់ Barcelona ថា គាត់​គ្រោង​នឹង​ចាកចេញ​ពី​ក្លឹប បន្ទាប់​ពី​កុងត្រា​របស់​គាត់​ផុត​កំណត់។ ទោះ​ជា​យ៉ាង​ណា​ក៏ដោយ Laporta ដែល​ជា​ប្រធាន​ក្លឹប បាន​បដិសេធ​លើ​រឿង​នេះ ហើយ​ថា​ខ្សែបម្រើ​របស់​គាត់មិន​មាន​គម្រោង​ចាកចេញ​ទេ ហើយ​ក្លឹប​ក៏​បាន​ត្រៀម​នឹង​ផ្ដល់​ជូន​កុងត្រា​ថ្មី​រយៈពេល 12 ខែ​បន្ថែម​ទៀត ដើម្បីឲ្យ​គាត់​បន្ត​អាជីព​នៅ​ទឹកដី​អេស្ប៉ាញ​បន្ត​ទៀត។

ប្រភព: Sportsmole