Cristiano Ronaldo ​បញ្ចេញ​កំហឹង បន្ទាប់​ពី​ក្រុម​របស់​ខ្លួន​បាន​ចាញ់ Al-Ittihad 1-0

ខ្សែ​ប្រយុទ្ធ​ឆ្នើម Cristiano Ronaldo មាន​ការ​ខឹង​សម្បារ​យ៉ាង​ខ្លាំង​បន្ទាប់​ពី​ក្រុម​របស់​ខ្លួន Al-Nassr បាន​ភ្លាត់​ចាញ់​គូ​ប្រជែង Al-Ittihad ក្នុង​លទ្ធផល 1-0 កាល​ពី​រំលង​អាធ្រាត​យប់​មិញ​នេះ។

ក្លឹប Al-Nassr មាន​ពិន្ទុ​ស្មើគ្នា​ជាមួយ​នឹង Al-Ittihad នៅ​ក្នុង​តារាង Saudi Pro League។ ប៉ុន្តែ​ពួក​គេ​បាន​ចាញ់​ក្នុង​ការ​ប្រកួត​នោះ ហើយ​ធ្វើ​ឲ្យ Al-Ittihad មាន​ឱកាស​ឡើង​​ទៅ​កាន់​តំណែង​កំពូល​តារាង​បណ្ដោះ​អាសន្ន​វិញ។

យ៉ាង​ណា​មិញ Cristiano Ronaldo បាន​ស៊ុត​ចំ​គោលដៅ​តែ​ 1 គ្រាប់​គត់ ក្នុង​អំឡុង​ពេល 90 នាទី​ពេញ ខណៈ​ដែល​កីឡាករ​សញ្ជាតិ​ព័រទុយហ្គាល់​រូបនេះ​ក៏​បាន​ខឹង​យ៉ាង​ខ្លាំង​នៅ​ពេល​ដែល​គាត់​បាន​ដើរ​ចេញ​ពី​ទីលាន​ប្រកួត។

Cristiano Ronaldo ត្រូវ​បាន​គេ​មើល​ឃើញ​ថា បាន​ហែក​ខ្សែ​ដៃ​កាពីតែន​ក្រុម​របស់​គាត់​ចេញ​ជាមួយ​នឹង​កំហឹង ហើយ​មិន​បាន​អើ​ពើ​​នឹង​ការ​លួងលោម​ឲ្យ​ស្ងប់​ចិត្ត​ពី​មិត្ត​រួម​ក្រុម​របស់​គាត់​ឡើយ។ លើស​ពី​នេះ​ទៅ​ទៀត គាត់​បាន​ស្ទុះ​ទៅ​ទាត់​ដប​ទឹកស៊ុត​ឡើង​ខ្ចាយ បន្ទាប់​ពី​លឺ​អ្នក​គាំទ្រ​របស់​ក្លឹប​ជា​គូ​ប្រជែង Al-Ittihad ស្រែក​ហៅ​ឈ្មោះ Messi។

ខ្សែ​ប្រយុទ្ធ Cristiano Ronaldo បាន​បរាជ័យ​ក្នុង​ការ​រក​គ្រាប់បាល់ដែល​មាន​ឱកាស​ល្អៗ​ចំនួន 2 លើក ដែល​ធ្វើ​ឲ្យ​អ្នកគាំទ្រ Al-Nassr មួយ​ចំនួន​មាន​ការ​មិន​ពេញ​ចិត្ត​នឹង​គាត់។ ទោះ​បី​ជា​យ៉ាង​ណា​ក៏ដោយ បច្ចុប្បន្ន Al-Nassr មាន​មួយ​ពិន្ទុ​តាម​ពី​ក្រោយ Al-Ittihad ក្នុង​ការ​ប្រជែង​ពាន​នៅ​រដូវកាល​នេះ ហើយ​ការ​ចាញ់​កាល​ពី​រំលង​អាធ្រាត​យប់​មិញ ជា​ការ​បរាជ័យ​លើក​ទីពីរ​របស់​ពួក​គេ​ក្នុង​យុទ្ធនាការ​រដូវកាល​នេះ។

ប្រភព: Mirror