បិសាចក្រហម និង Newcastle United កំពុង​ចាប់​អារម្មណ៍​ខ្លាំង​លើ Xavi Simons

ក្លឹប​បិសាចក្រហម Manchester United និង Newcastle United ត្រូវ​បាន​គេ​អះអាង​ថា កំពុង​តាម​ដាន​យ៉ាង​យក​ចិត្ត​ទុក​ដាក់ អំពី​ការ​វិវត្ត​នៃ​សមត្ថភាព​របស់​ខ្សែ​បម្រើ Xavi Simons របស់ PSV Eindhoven។ ប្រសិន​បើ​គុណភាព​នៅ​លើ​ទីលាន​របស់​កីឡាករ​វ័យ 19 ឆ្នាំ​រូប​នេះ ស្ថិត​ក្នុង​ស្ថានភាព​ដ៏​ល្អ​ដូច​បច្ចុប្បន្ន ក្លឹប​ទាំង 2 នឹង​ដាក់​សំណើរ​ផ្ទេរ​គាត់​នៅ​​ចុង​បញ្ចប់​នៃ​រដូវកាល​នេះ។

មុន​ពេល​ចាប់​ផ្តើម​រដូវកាល​ថ្មី​នេះ Xavi Simons ត្រូវ​បាន​គេ​ចាត់​ទុក​ថា ជា​កីឡាករ​វ័យ​ក្មេង​ដែល​មិន​មាន​សមត្ថភាព​លេង​បាន​ល្អ​ឡើយ ហើយ​ត្រូវ​ធ្វើ​ឲ្យ​ក្លឹប​យក្ស​បារាំង Paris Saint-Germain សម្រេច​ឲ្យ​គាត់​ចាកចេញ​ដោយ​គ្មាន​តម្លៃ​ខ្លួន​ទៅ​កាន់​ប្រទេស​កំណើត​របស់​ខ្លួន​វិញ​ដោយ​ចូល​រួម​ជា​មួយ PSV Eindhoven។

នៅ​ពេល​ផ្លាស់​ទៅ PSV ខ្សែ​បម្រើ​ប្រយុទ្ធ Xavi Simons បាន​ចុះ​កុងត្រា​រយៈពេល 5 ឆ្នាំ ប៉ុន្តែ PSG នៅ​មាន​សិទ្ធិ​ទិញ​គាត់​ត្រឡប់​មក​វិញ​បាន​នៅ​ចុង​ឆ្នាំ​នេះ។ ទោះ​ជា​យ៉ាង​ណា​ក៏ដោយនៅ​ជាមួយ PSV កីឡាករ​សញ្ជាតិ​ហូឡង់​រូប​នេះ បង្ហាញ​ពី​សមត្ថភាព​របស់​គាត់​ដោយស៊ុត​បញ្ចូលទី​បាន 15 គ្រាប់ និង Assists 8 ដង​ពី​ការ​បង្ហាញ​ខ្លួន 37 ប្រកួត។

យោងតាម​ការ​អះអាង​របស់​លោក Ekrem Konur បាន​ឲ្យ​ដឹង​ថា ក្លឹប​ធំៗ 2 នៅ​អង់គ្លេស​ដែល​មាន Manchester United និង Newcastle United កំពុង​ចាប់​អារម្មណ៍​លើ​ខ្សែបម្រើ​ប្រយុទ្ធ​រូប​នេះ។ ក្លឹប​ទាំង 2 នេះ​បាន​ដឹង​ថា Xavi Simons ជា​កីឡាករ​ដែល​មាន​ទេពកោសល្យ​ខ្ពស់ និង​អាច​លេង​បាន​ច្រើន​កន្លែង​ទាំង​នៅ​តំបន់​បម្រើ, បម្រើ​ប្រយុទ្ធ រឺ​ប្រយុទ្ធ​ស្លាប។

ប្រភព: Sportsmole