Manchester United នឹង​ដាក់​កីឡាករ 2 រូប​នេះ ឲ្យ​ខ្ចី​ជើង​ទៅ​ក្លឹប​ផ្សេង

ក្លឹប​បិសាចក្រហម Manchester United ត្រូវ​បាន​គេ​រាយការណ៍​ថា គ្រោង​នឹង​អនុញ្ញាត​ឲ្យ​កីឡាករ​របស់​ខ្លួន 2 រូប​ដែល​មាន Facundo Pellistri និង Anthony Elanga ចាកចេញ​ក្នុង​លក្ខ​ខណ្ឌ​ខ្ចី​ជើង​នៅ​រដូវកាល​ក្រោយ ខណៈ​ដែល​អ្នក​ទាំង​ពីរ​បាន​ជួប​ការ​លំបាក​ខ្លាំង​ក្នុង​ការ​ប្រជែង​រំណែង​លេង​នៅ Old Trafford រដូវកាល​នេះ។

ខ្សែ​បម្រើ Facundo Pellistri ដែល​មាន​វ័យ 21 ឆ្នាំ បាន​ទទួល​ការ​សរសើរ​ចំពោះ​សមត្ថភាព​របស់​គាត់​នៅ​ក្នុង​ការ​បង្ហាញ​ខ្លួន 6 ដង ក្នុង​ឆ្នាំ​នេះ។ កីឡាករ​អន្តរជាតិ​អ៊ុយ​រូហ្គាយ Assists បាន​ម្ដង ក្នុង​ការ​ប្រកួត​ទាំង​នោះ។ ប៉ុន្តែ​បើ​ប្រៀបធៀប​ទៅ​នឹង​កីឡាករ​ជើង​ចាស់​ជា​ច្រើន​ទៀតដែល​លេង​នៅ​តំបន់​បម្រើ​​របស់​ក្លឹប​បិសាចក្រហម នោះ​គាត់​មិន​អាច​ក្លាយ​ជា​ជម្រើស​របស់​ក្លឹប​ឡើយ។

ក្លឹប​បិសាចក្រហម Manchester United នឹង​ដាក់​គាត់​ឲ្យ​ខ្ចី​ជើង​ទៅ​ក្លឹប​ផ្សេង ដើម្បី​អាច​ឲ្យ​កីឡាករ​វ័យ​ក្មេង​រូប​នេះ​ទទួល​បាន​ឱកាស​លេង​បាន​ច្រើន និង​អភិវឌ្ឍន៍​សមត្ថភាព​ឲ្យ​កាន់​តែ​ប្រសើរ។

ទន្ទឹម​នឹង​នេះ​ដែរ Elanga ដែល​បច្ចុប្បន្ន​មាន​វ័យ 20 ឆ្នាំ គឺ​ជា​កីឡាករ​របស់ Manchester United ម្នាក់​ទៀត ដែល​ត្រូវ​បាន​គេ​រាយការណ៍​ថា នឹង​ត្រូវ​ក្លឹប​ឲ្យ​ចាកចេញ​ក្នុង​លក្ខខណ្ឌ​ខ្ចី​ជើង​ដូចគ្នា។ ខ្សែ​ប្រយុទ្ធ​ស្លាប​សញ្ជាតិ​ស៊ុយអែត​រូប​នេះ​ធ្លាប់​មាន​ភាព​លេចធ្លោរ និង​ទទួល​បាន​ឱកាស​លេង​ច្រើន​ក្នុង​​យុទ្ធនា​ការ​​ឆ្នាំ 2021-2022 ក្រោម​ការ​ដឹកនាំ​របស់​លោក Ole Gunnar Solskjaer និង Ralf Rangnick។

ទោះ​ជា​យ៉ាង​ណា​ក៏ដោយ ខ្សែប្រយុទ្ធ​រូបនេះ​មិន​មែន​ជា​ជម្រើ​របស់​លោក Erik ten Hag ក្នុង​រដូវកាល​នេះ​ឡើយ។ គាត់​បាន​បង្ហាញ​ខ្លួន​ជា​ជម្រើស​ដំបូង​ចំនួន 7 ប្រកួត ក្នុង​ចំណោម 23 ប្រកួត​របស់​បិសាចក្រហម និង​បាន​រួមចំណែក​ស៊ុត​បញ្ចូលទី​បាន 2 គ្រាប់។ Elanga ត្រូវ​បាន​ផ្សារ​ភ្ជាប់​ជាមួយ​នឹង​ការ​ផ្ទេរ​ទៅ Everton កាល​ពី​ខែ​មករា​កន្លង​ទៅ។ ទោះ​ជា​យ៉ាង​ណា​ក៏​ដោយ ពេល​នោះ​បិសាច​ក្រហម​មាន​ការ​ស្ទាក់ស្ទើរ​ក្នុង​ការបញ្ជូន​គាត់​ទៅ Goodison Park។

ប្រភព: Sportskeeda