អតីត​គ្រូ​បង្វឹក​ម្នាក់​របស់​មាន់​ខ្នាយមាស Tottenham Hotspur ចង់​ឲ្យ Luka Modric ត្រឡប់​ទៅ​លេង​នៅ​ក្លឹប​ចាស់​របស់​ខ្លួន​វិញ

អតីត​គ្រូ​បង្វឹក​របស់​ក្លឹប Tottenham Hotspur លោក Harry Redknapp បាន​បង្ហាញ​ពី​គំនិត​ផ្ទាល់​ខ្លួន​របស់​គាត់ ដោយ​ចង់​ឲ្យ​ខ្សែបម្រើ Luka Modric របស់ Real Madrid ត្រឡប់​ទៅ​ទឹកដី​អង់គ្លេស​វិញ និង​ចូល​រួម​ជា​មួយ​ក្លឹប​ចាស់​របស់​ខ្លួន Tottenham Hotspur នៅ​ចុង​បញ្ចប់​នៃ​រដូវកាល​នេះ។

ជា​ការ​ពិត​ណាស់ កុងត្រា​របស់​ខ្សែ​បម្រើ Luka Modric ជាមួយ​ក្លឹប​អធិរាជស Real Madrid នឹង​ផុត​កំណត់​នៅ​រដូវ​ក្តៅ​ឆ្នាំ​នេះ។ ទោះ​បី​ជា​យ៉ាង​ណា​ក៏​ដោយ ទម្រង់​លេង​របស់​តារា​ឆ្នើម​រូប​នេះ​នៅ​តែ​មាន​គុណភាព​ដ៏​អស្ចារ្យ ខណៈ​ដែល​គាត់​បាន​ឈាន​ចូល​ដល់​វ័យ 37 ឆ្នាំ​ទៅ​ហើយ។ ក្លឹប​យក្ស​អេស្ប៉ាញ Real Madrid កំពុង​ពិចារណា​ផង​ដែរ ទៅ​លើ​ការ​បន្ត​កុងត្រា​ថ្មី​រយៈ​ពេល​ខ្លី​ជាមួយ​នឹង​កីឡាករ​សញ្ជាតិ​ក្រូអាត​រូប​នេះ។

ដោយ​ឡែក​លោក Redknapp ដែល​ធ្លាប់​ជាអតីត​គ្រូ​បង្វឹក​របស់ Luka Modric នៅ​ក្លឹប Tottenham Hotspur បាន​សរសើរ​កីឡាករ​ជើង​ចាស់​រូប​នេះ​ជា​ខ្លាំង ជា​ពិសេស​ពេល​ដែល​គាត់​បាន​ជួយ​ឲ្យ​ក្លឹប Real Madrid ឡើង​ទៅ​កាន់​វគ្គ 8 ក្រុម​ចុង​ក្រោយ​នៃ​ក្របខណ្ឌ UEFA Champions League ដោយ​បាន​យក​ឈ្នះ​លើ​ហង្សក្រហម 6-2 (សរុប​ទាំងពីរ​ជើង)។ លើស​ពី​នេះ​ទៅ​ទៀត Harry Redknapp បាន​និយាយ​ថា គាត់​ស្រឡាញ់​នូវ​ទេពកោលស្យ​ដ៏​អស្ចារ្យ​របស់ Luka Modric ហើយ​គាត់​ចង់​ឲ្យ​ខ្សែបម្រើ​រូប​នេះ​ត្រឡប់​ទៅ Tottenham Hotspur វិញ។

ប្រភព: Sportskeeda