Harry Kane បង្ហើប​ថា គាត់​បាន​ចំណាយ​ពេល​ជាមួយ Son Heung-min ច្រើន​ជាង​ការ​ចំណាយ​ពេល​ជា​មួយ​ប្រពន្ធ​របស់​គាត់

តារាឆ្នើម​របស់​ក្លឹប Tottenham គឺ​ខ្សែ​ប្រយុទ្ធ Harry Kane បាន​បង្ហើប​ថា ទំនាក់​ទំនង​នៅ​លើ​ទីលាន​ប្រកួត​របស់​គាត់​ជាមួយ​ដៃ​គូប្រយុទ្ធ Son Heung-min គឺ​ជា​មិត្តភាព​ដ៏​ល្អ​របស់​ពួកគេ​លើស​ពី​អ្វី​ដែល​មាន​នៅ​លើ​ទីលាន។

Harry Kane បាន​ចាប់​ផ្ដើម​ជា​មួយ​នឹង​លទ្ធផល​មិន​សូវ​គាប់ប្រសើរ​ឡើយ កាល​ពី​ដើម​រដូវកាល ដោយ​ស៊ុតបញ្ចូលទី​បាន​តែមួយ​គ្រាប់​ប៉ុណ្ណោះ នៃ​ការប្រកួត​បើកឆាក Premier League ចំនួន 13 ប្រកួត​របស់គាត់។

ទោះបី​ជា​យ៉ាងណា​ក៏​ដោយ គាត់​បាន​បង្ហាញ​ទម្រង់​លេង​របស់​គាត់​ត្រឡប់​មក​វិញ​នៅ​ឆ្នាំ 2022 ដោយទម្រង់​ប្រយុទ្ធ​របស់​គាត់​កាន់​តែ​កាច​ជាមួយ​នឹង​ដៃគូ សញ្ជាតិ​កូរ៉េ​ខាង​ត្បូង Son Heung-min ខណៈ​ដែល​មាន​ការ​ជួយ​ជ្រុមជ្រែង​ពី​កីឡាករ​ចំនូល​ថ្មី​ដែល​លេង​នៅ​តំបន់​ស្លាប​ស្ដាំ Dejan Kulusevski។

Kane និង Son បាន​បំបែក​កំណត់​ត្រា​នៅ Premier League សម្រាប់​គ្រាប់​បាល់​ស៊ុតបញ្ចូលទី​ច្រើន​ជាង​គេ ជាមួយ​នឹង​ការ Assist ផ្សេងទៀត​នៅ​រដូវកាល​នេះ។
យ៉ាង​ណា​មិញ Harry Kane បាននិយាយ​ទៅ​កាន់​ទូរទស្សន៍ Canal+ អំពី​ទំនាក់ទំនង​ពិសេស​របស់​គាត់​ជាមួយ​កីឡាករ​សញ្ជាតិ​កូរ៉េខាងត្បូង ហើយ​ត្រូវ​បាន​គេ​សួរថា តើ​ប្រពន្ធ​របស់​គាត់​ច្រណែន​នឹង​រឿង​នេះ​រឺ​ទេ។ ពេល​នោះ Kane បាន​និយាយថា៖

“ប្រហែល​ជា​នាង​មិន​បាន​និយាយ​អ្វី​ពី​រឿង​នេះ​ទេ ប៉ុន្តែ​ខ្ញុំ​ប្រាកដ​ថា នាង​អាចជា​គិត​ខ្លះៗ​អំពី​រឿង​នេះ។ ខ្ញុំ​ប្រហែល​ជា​ចំណាយ​ពេល​ជាមួយ Son ច្រើន​ជាង​អ្វី​ដែល​ខ្ញុំ​ធ្វើ​ជាមួយ​ប្រពន្ធ​ខ្ញុំ នៅ​ពេល​នេះ។ នេះ​ជា​អ្វី​ដែល​ខ្ញុំ​និយាយ​ដោយ​ស្មោះត្រង់។ ពួក​យើង​មាន​ទំនាក់​ទំនង​ល្អ​ក្រៅទីលាន ហើយ​ជាក់ស្តែង ខ្ញុំគិត​ថា វា​ក៏​បង្ហាញ​នៅ​លើ​ទីលាន​ផងដែរ”។

ប្រភព: 90 Min