Rio Ferdinand ទស្សន៍ទាយ​ពី​ក្រុម​ទាំង 4 ដែល​នឹង​ឡើង​ទៅ​កាន់​វគ្គ​ពាក់កណ្ដាល​ផ្ដាច់ព្រ័ត UCL

អតីត​វីរបុរស​របស់​ក្លឹប​បិសាចក្រហម Manchester United លោក Rio Ferdinand បាន​បង្ហាញ​ពី​ការ​ទស្សន៍ទាយ ក៏​ដូច​ជា​ការ​យល់​ឃើញ​ផ្ទាល់​ខ្លួន​របស់​គាត់ ពាក់ព័ន្ធ​នឹង​ក្រុម​ដែល​នឹង​អាច​ទទួល​បាន​កៅអី​ឡើង​ទៅ​កាន់​វគ្គ​ពាក់​កណ្តាល​ផ្តាច់ព្រ័ត្រ UEFA Champions League។

Rio Ferdinand បាន​ចុច​ឈ្នោះ​ក្រុម 4 ដែល​នឹង​បន្ត​ដំណើរ​ផ្សងព្រេង​ក្នុង​ក្រប​ខណ្ឌ UEFA Champions League បន្ទាប់​ពី​ការ​ចាប់​ឆ្នោត​វគ្គ​ 8 ក្រុម​ចុង​ក្រោយ​កាល​ពី​ពេល​ថ្មីៗ​នេះ។ ការ​ចាប់​ឆ្នោត​បាន​បង្ហាញ​លទ្ធផល​ដ៏​គួរ​ឲ្យ​ចាប់​អារម្មណ៍​ពី​ក្រុម​មួយ​ចំនួន​ដែល​ត្រូវ​ប៉ះគ្នា ដោយ​ក្លឹប​អធិរាជស Real Madrid នឹង​ប្រកួត​ជាមួយ Chelsea ដែល​ដូច​ឆ្នាំ​មុន​ដែរ ដោយ​ពេល​នោះ Real Madrid បាន​យក​ឈ្នះតោខៀវ​ក្នុង​លទ្ធផល​សរុប​ទាំង 2 ជើង 5 ទល់​នឹង 4។

ដោយ​ឡែក​ក្រុម​ខ្លាំង​នៅ​អាឡឺម៉ង់ Bayern Munich នឹង​ត្រូវ​តទល់​ជាមួយ Manchester City ខណៈ​ដែល Napoli ត្រូវ​ជួប​នឹង​គូ​ប្រជែង​ក្នុង​លីគ​ជាមួយ​គ្នា AC Milan។ ទន្ទឹម​នឹង​នោះ​ដែរ Inter Milan ត្រូវ​បាន​គេ​មើល​ឃើញ​ថា ជា​ក្រុម​ដែល​ចាប់​ឆ្នោត​អំណោយ​ផល​ល្អ​ជាង​គេ ដោយ​ត្រូវ​ប៉ះ​ក្រុម​មក​ពី​លីគ​កំពូល​ព័រទុយហ្គាល់ Benfica។

Ferdinand បាន​បង្ហាញ​ពី​ការ​ព្យាករណ៍​របស់​គាត់​នៅ​លើ Twitter ថា៖ “Real Madrid, Manchester City, Inter Milan និង Napoli ជា​ក្រុម​ដែល​ឡើង​ទៅ​វគ្គ​បន្ទាប់”។

គួរ​ដឹង​ផង​ដែរ​ថា ក្នុង​ចំណោម​ក្រុម​ទាំង 8 ដែល​ត្រៀម​ប្រកួត​នៅ​ក្នុង​វគ្គ​នេះ មាន​ក្រុម​ចំនួន 2 ដែល​ក្នុងនោះ​គឺ Manchester City និង Napoli ជា​ក្រុម​ដែល​មិន​ធ្លាប់​ឈ្នះពាន UEFA Champions League ទាល់តែ​សោះ​ក្នុង​ប្រវត្តិសាស្ត្រ​ក្លឹប​របស់​ពួកគេ។

ប្រភព: Sportskeeda