អ្នក​តំណាង​របស់ Franck Kessie អះអាង​ថា ខ្សែ​បម្រើ​រូប​នេះ​នឹង​ចាកចេញ​ពី Barcelona លុះ​ត្រា​ណា​តែ​ពស់​ដុះ​ជើង

ភ្នាក់ងារ​របស់​ខ្សែបម្រើ Franck Kessie ថ្មីៗ​នេះ​បាន​ចេញ​មក​បដិសេធ​ទាំង​ស្រុង​លើ​ព័ត៌មាន​កន្លង​មក ដែល​លើក​ឡើង​ថា កីឡាករ​សញ្ជាតិ​កូតឌីវ័រ​រូប​នេះ អាច​ចាកចេញ​ពី Barcelona នៅ​ចុង​បញ្ចប់​នៃ​រដូវកាល​នេះ។ យ៉ាង​ណា​មិញ ម្ចាស់​អាវ​លេខ 19 រូប​នេះ បាន​ផ្លាស់​ទៅ Camp Nou ដោយ​គ្មាន​តម្លៃ​ខ្លួន​កាល​ពី​ឆ្នាំ​មុន បន្ទាប់​ពី​គាត់​បាន​ផុត​កុងត្រា​ជាមួយ AC Milan។

នៅ​រដូវកាល​នេះ Franck Kessie មិន​មែន​ជា​ជម្រើស​ដំបូង និង​ជា​កីឡាករ​សំខាន់​សម្រាប់​ការ​ដឹកនាំ​របស់​គ្រូ​បង្វឹក​លោក Xavi Hernandez នោះ​ទេ ប៉ុន្តែ​របួស​របស់ Pedri បាន​បើក​ឱកាស​ឲ្យ​កីឡាករ​វ័យ 26 ឆ្នាំ​រូប​នេះ ក្លាយ​ជា​កីឡាករ​សំខាន់​នៅ​ក្នុង​ក្រុម​ឡើង​វិញ។ លើស​ពី​នេះ​ទៅ​ទៀត ថ្មីៗ​នេះ Franck Kessie បាន​ក្លាយ​ជា​តួអង្គ​ដ៏​សំខាន់​ក្នុង​ជំនួស EL Clasico ដោយ​ស៊ុត​បញ្ចូលទី​ចុង​ម៉ោង 1 គ្រាប់ ដើម្បី​យក​ឈ្នះ Real Madrid ក្នុង​លទ្ធផល 2-1។

ក្នុង​សេចក្តី​ថ្លែងការណ៍​មួយ​ពី​ភ្នាក់ងារ​របស់ Franck Kessie បាន​​ចេញ​មក​បដិសេធ​យ៉ាង​ម៉ឺងម៉ាត់​នូវ​ពាក្យ​ចចាម​អារ៉ាម​អំពី​ការ​ចាកចេញ​នៅ​រដូវក្តៅ​នេះ ដោយ​បញ្ជាក់​ច្បាស់ៗ​ថា ខ្សែបម្រើ​កណ្ដាល​រូបនេះ​នឹង​បន្ត​នៅ Barcelona សម្រាប់​រដូវកាល 2023-2024 បន្ត​ទៀត។

អ្នក​កាសែត​អ៊ីតាលី Fabrizio Romano ក៏​បាន​ដកស្រង់​សម្ដី​របស់​ភ្នាក់ងារ​រូប​នេះ​ថា៖ “យើង​សូម​បដិសេធ​អំពី​ការ​ផ្ទេរ​ដែល​អាច​កើត​ឡើង​សម្រាប់ Franck Kessie។ ដូចគ្នា​នេះ​ដែរ សម្រាប់​កីឡាករ និង​ក្លឹប​ក៏​បាន​បដិសេធ​រឿង​នេះ​ដូចគ្នា ប៉ុន្តែ​ព័ត៌មាន​ក្លែងក្លាយ គឺ​ពិត​ជា​គួរ​ឲ្យ​រំខាន​ពេក​ហើយ។ ការ​ចាកចេញ​របស់ Kessie ពី Barcelona នៅ​រដូវក្ដៅ​នេះ គឺ​ប្រៀប​ដូច​ទៅ​នឹង​ការ​សង្ឃឹម​ថា សត្វ​ពស់ដុះ​ជើង​អញ្ចឹង​ដែរ”។

ប្រភព: Sportsmole