ប្រធាន​ក្លឹប Barcelona ថា ទ្វារ​របស់ Camp Nou បើក​ទទួល​រងចាំ Messi ជា​និច្ច

ថ្មីៗ​នេះ​ប្រធាន​ក្លឹប Barcelona លោក Joan Laporta បាន​និយាយ​ថា “ទ្វារ​របស់​ក្លឹប​ គឺ​បើកចំហ​រងចាំ​អតីត​កីឡាករ​របស់​ខ្លួន Lionel Messi ជា​និច្ច ដើម្បី​ការ​វិល​ត្រឡប់​មក​ជួប​ជុំ​ជាមួយ​ក្លឹប​ចាស់​របស់​ខ្លួន​វិញ​នៅ​ចុង​បញ្ចប់​នៃ​រដូវកាល​នេះ។ យ៉ាង​ណា​មិញ ពេល​នេះ Lionel Messi ក៏​ប្រហែល​ជា​មិន​បន្ត​កុងត្រា​ថ្មី​ជាមួយ PSG ដែល​ជា​ក្លឹប​បច្ចុប្បន្ន​របស់​ខ្លួន​ផង​ដែរ ហើយ​គាត់​អាច​នឹង​ចាកចេញ​ពី​ទឹកដី​បារាំង ក្នុង​នាម​ជា​កីឡាករ​គ្មាន​តម្លៃ​ខ្លួន។

គ្រប់​គ្នា​បាន​ដឹង​ថា Lionel Messi បាន​ចាកចេញ Camp Nou កាល​ពី​រដូវ​ក្តៅ​ឆ្នាំ 2021 ទាំង​បង្ខំ​ចិត្ត ខណៈ​ដែល​ក្លឹប​កាតាឡាន់ Barcelona មិន​អាច​បន្ត​កុងត្រា​ថ្មី​ជា​មួយ​គាត់​បាន ដោយ​សារ​បញ្ហា​ហិរញ្ញវត្ថុ​របស់​ក្លឹប។ កីឡាករ​វ័យ 35 ឆ្នាំ​រូបនេះ​បាន​ចំណាយ​ពេល 2 រដូវកាល ជាមួយ Paris Saint-Germain ដោយ​ស៊ុត​បញ្ចូលទី​បាន 29 គ្រាប់ និង​បញ្ជូនបាល់​ឲ្យ​មិត្ត​រួម​ក្រុម​បាន 32 ដង ក្នុង​ការ​បង្ហាញ​ខ្លួន 66 ប្រកួត។

ស្រប​ពេល​ដែល​កុងត្រា​របស់ Lionel Messi ដែល​នឹង​ត្រូវ​ផុត​កំណត់​នៅ​ចុង​ខែ​មិថុនា គាត់​ត្រូវ​បាន​គេ​ជឿថា មាន​ជម្រើស 3 ផ្សេងៗ​គ្នា ដោយ​អាច​នឹង​ត្រឡប់​មក Barcelona វិញ រឺ​ចាកចេញ​ទៅ​ទឹកដី​អាមេរិច ហើយ​ចូលរួមជាមួយ​ក្លឹប Inter Miami នៅ​លីគ​កំពូល​អាមេរិច MLS និង​ជម្រើស​ចុង​ក្រោយ​មួយ​ទៀត​គឺ​ទៅ​ចូលរួម​ជាមួយ​ក្លឹប​នៅ​អារ៉ាប៊ីសាអូឌីត។

ខណៈ​ដែល​គ្រប់យ៉ាង​មិន​ទាន់​បាន​សម្រេច​នោះ ប្រធាន​ក្លឹប Barcelona ក៏​បាន​បង្ហាញ​ពី​បំណង​របស់​ខ្លួន ក្នុង​ការ​នាំ​យក​តារា​ឆ្នើម​សញ្ជាតិ​អាហ្សង់ទីន​រូប​នេះ ត្រឡប់​មក​ទឹកដី​អេស្ប៉ាញ​វិញ។ លោក Laporta បាន​ប្រាប់ The Business & Money Behind Sports ថា៖ “Messi ពិត​ជា​ដឹង​ថា ទ្វារ​របស់ Barcelona នៅ​បើក​ចំហ​សម្រាប់​គាត់។ យើង​នឹង​រងចាំ​មើល​ការ​សម្រេច​ចិត្ត​របស់​គាត់។ ខ្ញុំ​ត្រូវ​តែ​ស្វែងរក​វិធី ដើម្បី​កែ​លម្អ​ទំនាក់​ទំនង​បច្ចុប្បន្ន​រវាង Messi និង Barcelona ឡើង​វិញ”។

ប្រភព: Sportsmole