Connect with us

បាល់ទាត់អន្តរជាតិ

Ronaldinho បង្ហាញ​គំនិត​គាំទ្រ​ឲ្យ Barcelona នាំ​យក Messi ត្រឡប់​មក​វិញ

Published

on

វីរបុរស​របស់​ក្លឹប​អ្នក​មាន​បុណ្យ Barcelona លោក Ronaldinho បាន​លើក​ឡើង​ថា គាត់​នឹង​សប្បាយ​ចិត្ត ប្រសិន​បើ​ឃើញ​អតីត​ប្រធាន​ក្រុម Lionel Messi វិល​ត្រឡប់​មក Camp Nou ដើម្បី​ជួប​ជុំ​ក្លឹប​ចាស់​របស់​ខ្លួន និង​បញ្ចប់​អាជីព​បាល់ទាត់​របស់​គាត់ ជាមួយ​ក្លឹប​យក្ស​កាតាឡាន់​មួយ​នេះ។

បុរស​ឆ្នើម Ronaldinho ធ្លាប់​លេង​ជា​មួយ Messi ក្នុង​អំឡុង​ពេល​ពួក​គេ​នៅ Barcelona ជាមួយ​គ្នា។ យ៉ាង​ណា ខ្សែប្រយុទ្ធ​សញ្ជាតិ​ប្រេស៊ីល​រូប​នេះ​បាន​ចូល​និវត្តន៍​ពី​បាល់ទាត់​តាំង​ពី​ថ្ងៃ​ទី 16 ខែ​មករា ឆ្នាំ 2018 ម្ល៉េះ។ ទន្ទឹម​នឹង​នេះ​ដែរ Lionel Messi ក៏​បាន​ចាកចេញ​ពី Barcelona ទៅ Paris Saint-Germain នៅ​រដូវក្តៅ​ឆ្នាំ 2021 ដោយ​សារ​ក្លឹប​ជួប​បញ្ហា​ហិរញ្ញ​វត្ថុ។

ដោយ​ឡែក​ពេល​នេះ កុងត្រា​របស់ Messi ជាមួយ​ក្លឹប​យក្ស​បារាំង PSG នឹង​ផុត​កំណត់​នៅ​ចុង​បញ្ចប់​នៃរដូវកាលនេះ ហើយ​គាត់​មិន​ទាន់​បាន​សម្រេច​ចិត្ត​ចុះ​កុងត្រា​ថ្មី ដើម្បី​បន្ត​ជីវិត​នៅ Ligue 1 នៅ​ឡើយ​ទេ។ ស្រប​ពេល​ដែល​អនាគ​របស់ Lionel Messi កំពុង​ស្ថិត​នៅ​ក្នុង​ភាព​ស្រពេច​ស្រពិល​នោះ មជ្ឈដ្ឋាន​បាល់ទាត់​ជា​ច្រើន​បាន​លើក​ឡើង​ថា គាត់​នឹង​មាន​ភាគរយ​ខ្ពស់​ក្នុង​ការ​ត្រឡប់​មក​កាន់ Barcelona ដែល​ជា​អតីត​ក្លឹប​ពី​កុមារភាព​របស់​គាត់​វិញ។

រឿង​នេះ​ដែរ ក៏​បាន​ធ្វើ​ឲ្យ Ronaldinho ដែល​ធ្លាប់​ជា​មិត្ត​រួម​ក្រុម​នឹង Messi បញ្ចេញ​មតិ​គាំទ្រ ដោយ​ចង់​ឃើញ តារា​ឆ្នើម​អាហ្សង់ទីន​រូប​នេះ មក​ជួប​ជុំ​ក្លឹប​ដែល​គាត់​ស្រឡាញ់​បំផុត​វិញ។ Ronaldinho បាន​និយាយ​​តាម​រយៈ Sport ថា៖ “ខ្ញុំ​ជា​មិត្ត​នឹង Messi ខ្ញុំ​សប្បាយ​ចិត្ត​ណាស់ ​ដែល​​បាន​ឃើញ​គាត់​ឈ្នះ​ពាន​ក្នុង​ក្តី​ស្រមៃ (World Cup) របស់គាត់។ សម្រាប់​ខ្ញុំ កីឡាករ​ល្អ​បំផុត​គឺ Messi។ ខ្ញុំ​ចង់​ឃើញ​គាត់​សប្បាយ​ចិត្ត ខ្ញុំ​មិន​ខ្វល់​ថា គាត់​នៅ​ជាមួយ​ក្លឹប​ណា​ទេ។ គាត់​បាន​កសាង​ប្រវត្តិសាស្រ្ត​ទាំង​អស់​ជាមួយ Barcelona ហើយ​វា​ពិត​ជា​ល្អណាស់ ប្រសិន​បើ​គាត់​អាច​បញ្ចប់​អាជីព​របស់​គាត់​នៅ​ទីនោះ”។

ប្រភព: Dailypost NG

Trending

© រក្សា​សិទ្ធិ​គ្រប់​យ៉ាង​ដោយ​ X-SPORT ឆ្នាំ​ ២០២២