បាល់ទាត់អន្តរជាតិ

បិសាចក្រហមនឹងនាំយក Kolo Muani មកជំនួសកន្លែងរបស់ Weghorst

Published

1 year ago

March 27, 2023

Lee Lee

ក្លឹបបិសាចក្រហម Manchester United ត្រូវបានគេរាយការណ៍ថា កំពុងមានភាគរយខ្ពស់ក្នុងការចុះហត្ថលេខាលើតារាឆ្នើមរបស់ Frankfurt គឺកីឡាករ Randal Kolo Muani។ យ៉ាងណាមិញខ្សែប្រយុទ្ធសញ្ជាតិបារាំងរូបនេះ កំពុងក្លាយជាគោលដៅនៃការចង់បានពីក្លឹបធំៗជាច្រើននៅចុងបញ្ចប់នៃរដូវកាលនេះ។

កាលពីខែមករាកន្លងទៅលោក Erik ten Hag បានស្វែងរកបេក្ខភាពខ្សែប្រយុទ្ធកណ្ដាលថ្មីម្នាក់មក Old Trafford ហើយជាចុងក្រោយពួកគេបានខ្ចីជើង Wout Weghorst ពីក្លឹប Burnley ដែលការខ្ចីជើងនេះនឹងមានរយៈពេលរហូតដល់បញ្ចប់រដូវកាល។ ដោយឡែកខ្សែប្រយុទ្ធរូបនេះ ប្រហែលជាមិនត្រូវបានក្លឹបបិសាចក្រហមទិញផ្ដាច់កុងត្រានោះឡើយ ហើយឲ្យគាត់ត្រឡប់ទៅក្លឹបចាស់របស់ខ្លួនវិញ។

ផ្សេងពីនេះដែរតារាឆ្នើមរបស់ក្លឹប Tottenham Hotspur គឺកីឡាករ Harry Kane និងខ្សែប្រយុទ្ធ Victor Osimhen របស់ Napoli ជាបេក្ខភាពដែលគេដឹងថា បិសាចក្រហមជ្រើសរើសមុន Kolo Muani ប៉ុន្តែតម្លៃផ្ទេររបស់តារាឆ្នើមទាំង 2 រូបនេះ ច្រើនជាង 100 លានផោន។

យោងតាមអ្នកកាសែត Christian Falk បានលើកឡើងថា ទម្រង់លេងគួរឲ្យចាប់អារម្មណ៍របស់ Kolo Muani នៅរយៈពេលចុងក្រោយនេះ បានទាក់ទាញចំណាប់អារម្មណ៍ពីក្លឹបធំៗជាច្រើន ហើយជាពិសេសគឺក្លឹបបិសាចក្រហម Manchester United ព្រោះពួកគេពិតជាត្រូវការខ្សែប្រយុទ្ធកណ្ដាលម្នាក់ជាចាំបាច់។ ទន្ទឹមនឹងនេះដែរ ក្លឹប Frankfurt ដែលជាក្លឹបបច្ចុប្បន្នរបស់គាត់ ត្រូវបានគេគិតថា នឹងលក់ Randal Kolo Muani ប្រសិនបើមានការដេញថ្លៃដ៏សមរម្យមួយ។