Connect with us

បាល់ទាត់អន្តរជាតិ

បង​ប្រុស​របស់ Amrabat បង្ហើប​ថា ក្លឹប​បិសាចក្រហម Manchester United ធ្លាប់​បាន​ដាក់​សំណើរ​ខ្ចី​ជើង​ប្អូន​របស់​ខ្លួន ប៉ុន្តែ​ត្រូវ​បរាជ័យ

Published

on

បងប្រុស និង​ជា​ភ្នាក់ងារ​របស់​ខ្សែបម្រើ Sofyan Amrabat ដែល​ជា​កីឡាករ​របស់​ក្លឹប Fiorentina បាន​បង្ហើប​ឲ្យ​ដឹង​ថា ក្លឹប​បិសាចក្រហម Manchester United បាន​បរាជ័យ​ជាមួយ​នឹង​ការ​ដាក់​សំណើរ​ខ្ចី​ជើង​ប្អូន​ប្រុស​របស់​ខ្លួន កាល​ពី​ខែ​មករា ដើម​ឆ្នាំ​នេះ។

កីឡាករ​វ័យ 26 ឆ្នាំ​រូបនេះ បាន​ទទួល​ភាព​ល្បីល្បាញ​កាន់​តែ​ខ្លាំង ក្នុង​នាម​ជា​សមាជិក​​ដ៏​សំខាន់​នៃ​ក្រុម​ជម្រើស​ជាតិ​ម៉ារ៉ុក ដែល​បាន​បង្កើត​ប្រវត្តិសាស្ត្រ​បាល់ទាត់​នៃ​ប្រទេស​របស់​ខ្លួន ក្នុង​ព្រឹត្តិការណ៍​បាល់ទាត់​ពិភពលោក 2022។ ក្រុម​ជម្រើស​ជាតិ​ម៉ារ៉ុក បាន​ក្លាយជា​ប្រទេស​មក​ពី​តំបន់​អាហ្វ្រិក​ដំបូង​គេ ដែលបាន​ឡើង​​ដល់​វគ្គ​ពាក់​កណ្តាល​ផ្តាច់ព្រ័ត្រ FIFA World Cup។

មជ្ឈដ្ឋាន​បាល់ទាត់ បាន​ចាប់​អារម្មណ៍​លើ Amrabat ជាមួយ​នឹង​ការ​បង្ហាញ​នូវ​ទម្រង់​លេង​ដ៏​អស្ចារ្យ​របស់​គាត់​នៅ​តំបន់​បម្រើ​កណ្ដាល។ គាត់​បាន​លេង​គ្រប់​ប្រកួត និង​គ្រប់​នាទី​ទាំង​អស់ នៃ​បេសកកម្ម​ក្នុង​ប្រទេស​កាតា​អំឡុង​ពេល​នោះ។ ក្រោយ​មក​ទៀត មាន​ក្លឹប​ធំៗ​ជា​ច្រើន បាន​ពេញ​ចិត្ត និង​ចាប់​ផ្ដើម​ទាក់ទង​ដើម្បី​ចរចា​ផ្ទេរ​កីឡាករ​វ័យ 26 ឆ្នាំ​រូប​នេះ ដែល​ក្នុង​ចំណោម​ក្លឹប​ទាំង​នោះ​ក៏​មាន Barcelona និង Manchester United ផង​ដែរ។

ទោះ​ជា​យ៉ាង​ណា​ក៏​ដោយ មិន​មាន​ក្លឹប​ណា​មួយ​បញ្ចប់​ការ​​ផ្ទេរ Amrabat ឡើយ ហើយ​គាត់​ក៏​បន្ត​អាជីព​បាល់ទាត់​របស់​ខ្លួន​ជាមួយ​ក្លឹប​បច្ចុប្បន្ន Fiorentina ដដែល។ ដោយ​ឡែក​ថ្មីៗ​នេះ Nordin Amrabat ដែល​ត្រូវ​ជា​បង​ប្រុស​របស់ Amrabat និង​ជា​អ្នក​តំណាង​របស់​កីឡាករ​រូប​នេះ បាន​បង្ហាញ​ឲ្យ​ដឹង​ថា ក្លឹប​បិសាចក្រហម Manchester United ជា​ក្លឹប​ដែល​បាន​ដាក់​សំណើរ​ខ្ចី​ជើង​ប្អូន​របស់​ខ្លួន​កាល​ពី​ខែ​មករា ប៉ុន្តែ​ការ​ខ្ចី​ជើង​នោះ​មិន​បាន​សម្រេច ដោយ​សារ​ក្លឹប Fiorentina បាន​បដិសេធ និង​ច្រាន​ចោល​សំណើរ​នោះ។

ប្រភព: Sportsmole

Trending

© រក្សា​សិទ្ធិ​គ្រប់​យ៉ាង​ដោយ​ X-SPORT ឆ្នាំ​ ២០២២