Tottenham Hotspur ទាក់ទង​ទៅ​លោក Zinedine Zidane ដើម្បី​ឲ្យ​មក​ធ្វើ​ជា​គ្រូ​បង្វឹក​ថ្មី​របស់​ខ្លួន

ក្លឹប​មាន់ខ្នាយ​មាស Tottenham Hotspur ត្រូវ​បាន​គេ​រាយការណ៍​ថា កំពុង​ពិចារណា​លើ​ការ​ព្យាយាម​តែង​តាំង​លោក Zinedine Zidane ជា​គ្រូបង្វឹក​បន្ទាប់​របស់​ពួក​គេ។ ពេល​នេះ​ពួក​គេ​មិន​ទាន់​បាន​ប្រកាស​ពី​បេក្ខភាព​គ្រូ​បង្វឹក​ថ្មី​នោះ​ទេ បន្ទាប់​ពី​បណ្ដេញ​លោក Antonio Conte ចេញ​ពី​តំណែង​កាល​ពី​ប៉ុន្មាន​ថ្ងៃ​មុន។

បច្ចុប្បន្ន​លោក Cristian Stellini ត្រូវ​បាន​ក្លឹប​ដាក់ឲ្យ​នៅ​ដឹកនាំ​បណ្ដោះអាសន្ន ដោយ​មាន​ជំនួយ​ការ​លោក Ryan Mason ហើយ​អ្នក​ទាំង​ពីរ​នឹង​ត្រូវ​ព្យាយាម​ធ្វើ​ឲ្យ Tottenham Hotspur បញ្ចប់​រដូវកាល​ក្នុង​ចំណាត់​ថ្នាក់ Top 4 នៃ​តារាង Premier League ទម្រាំ​ដល់​ពេល​ដែល​ក្លឹប​អាច​​ស្វែង​រក​គ្រូ​បង្វឹក​ថ្មី​មក​ដឹកនាំ​រយៈពេល​វែង​បាន។

លោក Julian Nagelsmann ដែល​ជា​អតីត​គ្រូបង្វឹក​របស់​ក្លឹប Bayern Munich ត្រូវ​បាន​ផ្សារ​ភ្ជាប់​យ៉ាង​ខ្លាំង​ជាមួយ​នឹង​ការ​ទៅ​កាន់​ទីក្រុងឡុងដ៍​ខាង​ជើង​ដើម្បី​ដឹកនាំ Tottenham Hotspur ខណៈ​ដែល​អតីត​គ្រូ​បង្វឹក​លោក Mauricio Pochettino ក៏​កំពុង​ត្រូវ​បាន​ក្លឹប​មាន់​ខ្នាយ​មាស​ពិចារណា​ផង​ដែរ។

យ៉ាង​ណា​មិញ​យោង​តាម Sky Italia បាន​ឲ្យ​ដឹង​ថា លោក Zinedine Zidane ជា​បេក្ខភាព​ដែល Tottenham Hotspur ចង់​បាន​បំផុត សម្រាប់​ការ​មក​កាន់​កាប់​នៅ​តំណែង​ទំនេរ​នេះ។ អតីត​គ្រូបង្វឹកសញ្ជាតិ​បារាំង Zinedine Zidane ជា​គ្រូ​បង្វឹក​ដ៏​ជោគជ័យ​បំផុត​មួយ​រូប​របស់ Real Madrid ដោយ​ធ្លាប់​បាន​លើក​ពាន La Liga 2 លើក និង​ពានរង្វាន់ UEFA Champions League 3 លើ​ជាប់ៗ​គ្នា។

ប្រភព: Sportsmole