Carlo Ancelotti ថា Messi ជា​កីឡាករ​ដ៏​អស្ចារ្យ​ម្នាក់ ប៉ុន្តែ​មិន​មែន​ល្អ​បំផុត​នោះ​ទេ

គ្រូ​បង្វឹក​របស់​ក្លឹប​អធិរាជស Real Madrid លោក Carlo Ancelotti បាន​លើក​ឡើង​ថា តារា​ឆ្នើម Lionel Messi មិនមែន​ជា​កីឡាករ​បាល់ទាត់​ល្អ​បំផុត​ក្នុង​ប្រវត្តិសាស្ត្រ​នោះ​ទេ ដោយ​មាន​កីឡាករ​មួយ​ចំនួន​​ផ្សេង​ទៀត ក៏​អស្ចារ្យ​ដែរ។ ដោយ​ឡែក Messi បានស៊ុតបញ្ចូលទីគ្រាប់ទី 803 ក្នុង​អាជីព​របស់​គាត់ នៅ​ក្នុង​ការ​ប្រកួត​ជាមួយ​ក្រុម​ជម្រើស​ជាតិ Curacao កាល​ពី​ម្សិលមិញ​នេះ។

ក្នុង​ចំណោម​គ្រាប់​បាល់​សរុប 803 គ្រាប់​នៃ​អាជីព​បាល់ទាត់​របស់​ខ្លួន មាន 102 គ្រាប់​ជា​ការ​ស៊ុត​បញ្ចូលទី​សម្រាប់​ក្រុម​ជម្រើស​ជាតិ​អាហ្សង់ទីន។ បច្ចុប្បន្ន Lionel Messi មាន​គ្រាប់​បាល់​សរុប​ចាញ់ Cristiano Ronaldo ត្រឹមតែ 30 គ្រាប់​ប៉ុណ្ណោះ ហើយ​គាត់​ជា​កីឡាករ​ទី 3 ដែល​មាន​គ្រាប់​បាល់​ច្រើន​ជាង​គេ​នៅ​ក្នុង​ប្រវត្តិសាស្ត្រ​បាល់ទាត់ ខណៈ​ដែល​អតីត​វីរបុរស Josef Bican មាន​គ្រាប់បាល់​សរុប 805 គ្រាប់។

ក្រៅ​ពី​កំណត់ត្រា​ផ្សេងៗ​នោះ ខ្សែ​ប្រយុទ្ធ​ឆ្នើម Lionel Messi បាន​ដឹកនាំ​អាហ្សង់ទីន​ឲ្យ​ទទួល​បាន​ជ័យជម្នះ​ក្នុង​ព្រឹត្តិការណ៍ FIFA World Cup 2022 នៅ​ប្រទេស​កាតា​កាល​ពី​ខែធ្នូ។ សមិទ្ធិផល​ដ៏​អស្ចារ្យ​នេះ បាន​ធ្វើ​ឲ្យ​អ្នកគាំទ្រ និង​មជ្ឃដ្ឋាន​បាល់ទាត់​ជា​ច្រើន​មើល​ឃើញ​ថា គាត់​គឺ​ជា​កីឡាករ​ល្អ​បំផុត​ក្នុង​ប្រវត្តិសាស្ត្រ​បាល់ទាត់ ព្រោះ​គ្មាន​ពាន​ណា​មួយ​ដែល​តារា​ឆ្នើម Lionel Messi មិន​ធ្លាប់​ឈ្នះ​ឡើយ។

ផ្ទុយ​មក​វិញ​ម្ចាស់​ពាន Ballon d’Or 7 សម័យ​កាល​រូប​នេះ មិន​ត្រូវ​បាន​គ្រូ​បង្វឹក​សញ្ជាតិ​អ៊ីតាលី​លោក Carlo Ancelotti ទទួល​ស្គាល់​ថា គាត់​ជា​កីឡាករ​ល្អ​បំផុត​នោះ​ទេ។ គ្រូ​បង្វឹក​រូប​នេះ​បាន​ប្រាប់ GOAL ដោយ​និយាយ​ថា៖ “តើ Messi ល្អ​​បំផុត​​ក្នុង​ប្រវត្តិសាស្ត្រ​រឺ? គាត់​ជា​កីឡាករ​ដ៏​អស្ចារ្យ​ម្នាក់ ប៉ុន្តែ​ខ្ញុំ​មិន​អាច​និយាយ​​ថា កីឡាករ​រូប​ណា​ល្អ​ជាង​គេ​បំផុត​នោះ​ទេ។ មាន​កីឡាករ​អស្ចារ្យ​ជា​ច្រើន​ទៀត​ដូច​ជា Maradona, Di Stefano, Cruyff…”។

ប្រភព: Sportsbrief