Rooney លើក​ឡើង​ថា ទោះ​មាន​រឿង​ល្អក់កករ​ពី​មុន Cristiano Ronaldo នៅ​តែ​ជា​វីរបុរស​របស់​ក្លឹប​បិសាចក្រហម

អតីត​កីឡាករ​របស់​ក្លឹប​បិសាចក្រហម Manchester United គឺ​កីឡាករ Wayne Rooney បាន​អះអាងថា ការ​ចាកចេញ​ដ៏​ចម្រូង​ចម្រាស​របស់ Cristiano Ronaldo កាល​ពី​ខែ​វិច្ឆិកា​ឆ្នាំ​មុន មិន​បាន​ធ្វើ​ឲ្យ​ប៉ះពាល់​ដល់​កេរ្តិ៍​ដំណែល និង​ស្នាដៃ​ដែល​គាត់​ធ្លាប់​បាន​សាង​នៅ Old Trafford កន្លង​មក​នោះ​ឡើយ។

យ៉ាង​ណា​មិញ Cristiano Ronaldo បាន​ចែកផ្លូវ​គ្នា​ជាមួយ​ក្លឹប​បិសាចក្រហម ដោយ​មាន​ការ​ព្រម​​ព្រៀង​គ្នា​ទៅ​វិញ​ទៅ​មក។ ការ​ចាកចេញ​នោះ​បាន​ធ្វើ​ឡើង បន្ទាប់​ពី​តារា​ឆ្នើម​រូបនេះ បាន​ផ្ដល់​កិច្ច​សម្ភាសន៍ ដោយ​រិះគន់​គ្រូបង្វឹក​លោក Erik ten Hag និង​រិះគន់​ក្លឹបចំៗ​។ បិសាចក្រហម​បាន​បញ្ចប់​កុងត្រា​របស់​គាត់ ហើយ Cristiano Ronaldo បាន​ទៅ​ចូលរួម​ជាមួយ​ក្លឹប​អារ៉ាប៊ីសាអូឌីត Al-Nassr។

នៅក្នុង​បទ​សម្ភាសន៍​ជាមួយ CNN អតីត​តារា​ឆ្នើម​របស់ Manchester United លោក Wayne Rooney បាន​និយាយ​អំពី​ការ​ចាកចេញ​ដ៏​អាស្រូវ​របស់ Cristiano Ronaldo ដោយ​បាន​បង្ហាញ​ពីកេរ្តិ៍ដំណែល​របស់​តារា​ឆ្នើម​សញ្ជាតិ​ព័រទុយហ្គាល់​នៅ Manchester United កន្លង​មក ដោយ​និយាយ​ថា៖ “ខ្ញុំ​គិត​ថា អ្វី​ដែល​គាត់​បាន​ធ្វើ​សម្រាប់ Manchester United គឺ​អស្ចារ្យ​ណាស់។ ​គាត់​បាន​ឈ្នះពាន​រង្វាន់ Premier League, ឈ្នះ UEFA Champions League និង​ស៊ុត​បញ្ចូលទី​បាន​ច្រើន។ ដូច្នេះ​ខ្ញុំ​ប្រាកដ​ថា សម្រាប់​អ្នកគាំទ្រ និង​​សម្រាប់​កីឡាករ ក៏​ដូច​ជា អតីត​មិត្ត​រួមក្រុម​របស់​គាត់ ដែល​បាន​លេង​ជាមួយ​គាត់​តាំង​ពី​ជំនាន់​ខ្ញុំ ជា​ពិសេស​ពួកយើង​នឹង​មិន​ភ្លេច​នូវ​អ្វី​ដែល​គាត់​បាន​ធ្វើ​សម្រាប់ Manchester United ឡើយ”។

Wayne Rooney បាន​បន្ថែម​ទៀត​ថា៖ “នៅ​ក្នុង​ភ្នែក​របស់​ខ្ញុំ គាត់​តែងតែ​ជា​ជើង​ខ្លាំង​របស់​ក្លឹប ហើយ​វា​ជា​រឿង​ដ៏អាម៉ាស់​មួយ ដែលវា​បញ្ចប់​ទៅ​ដោយ​បែប​នេះ។ ប៉ុន្តែ​ខ្ញុំ​គិត​ថា រឿង​នេះមិន​អាច​ធ្វើ​ឲ្យ​បាត់បង់​កេរ្តិ៍ដំណែល​របស់​គាត់​នៅ​ក្លឹប​នោះ​ទេ”។

ប្រភព: Sportskeeda