អតីត​កីឡាករ​ម្នាក់រ​បស់ Chelsea ប្រាប់​ឲ្យ​ក្លឹប​របស់​ខ្លួន ទិញ​យក​ខ្សែ​ប្រយុទ្ធ​រូប​នេះ​ត្រឡប់​មក​វិញ

អតីត​កីឡាករ​ម្នាក់​របស់​ក្លឹប​តោខៀវ Chelsea គឺ​លោក Chris Sutton បាន​ប្រាប់​ក្លឹប​ឲ្យ​ទិញ​យក​ខ្សែប្រយុទ្ធ Tammy Abraham មក​វិញ ព្រោះ​លោក​ជឿជាក់​ថា កីឡាករ​សញ្ជាតិ​អង់គ្លេស​រូប​នេះ នឹង​អាច​ដោះស្រាយ​បញ្ហា​នៅ​តំបន់​ប្រយុទ្ធ​ដែល​ក្លឹប​កំពុង​ជួប​ប្រទះ​បាន។ លោក​បាន​បន្ថែម​ថា ប្រសិន​បើ​អាច​យក​គាត់​មក​វិញ ក្នុង​តម្លៃ 68 លានផោន​នៅ​រដូវក្ដៅ​នេះ គឺ​ល្អ​បំផុត។

កន្លង​មក​ក្លឹ​បតោខៀវ Chelsea បាន​អនុញ្ញាត​ឲ្យ​ខ្សែប្រយុទ្ធ​រូបនេះ​ទៅ​ចូលរួម​ជាមួយ​ក្លឹប Roma របស់​អ៊ីតាលី​ក្នុង​ឆ្នាំ 2021។ ស្រប​ពេល​ជាមួយ​គ្នា​នោះ​ដែរ ក្លឹបតោខៀវ​បាន​ចំណាយ​ប្រាក់ 97.5 លានផោន សម្រាប់​ការ​ចុះ​ហត្ថលេខា​លើ​ខ្សែ​ប្រយុទ្ធ Romelu Lukaku ដើម្បី​លេង​នៅ​តំបន់​ប្រយុទ្ធ​កណ្ដាល។

រដូវកាល​ដំបូង​ជាមួយ Roma កីឡាករ​វ័យ 25 ឆ្នាំ Tammy Abraham រក​គ្រាប់​បាល់​បាន 27 គ្រាប់ ខណៈ​ដែល Lukaku មាន​ទម្រង់​លេង​ធ្លាក់​ចុះ​យ៉ាង​ខ្លាំង និង​ត្រូវ​បាន​បញ្ជូន​ត្រឡប់​ទៅ Inter Milan ក្នុង​លក្ខខណ្ឌ​ខ្ចី​ជើង​វិញ បន្ទាប់​ពី​ត្រលប់​មក Stamford Bridge បាន​តែ​មួយ​រដូវ​កាល។

Chelsea កំពុង​សម្លឹង​មើល​បេក្ខភាព​ខ្សែប្រយុទ្ធ​ឆ្នើម​មួយ​រូប​នៅ​រដូវក្តៅ​នេះ ហើយ​ក្លឹប​ត្រូវ​បាន​ផ្សារភ្ជាប់​ជាមួយ​នឹង​តារា​ឆ្នើម​របស់ Napoli គឺ​កីឡាករ Victor Osimhen។ យ៉ាង​ណា​សម្រាប់​លោក Chris Sutton យល់​ថា ក្លឹប​អាច​ពិចារណា​នាំ​រក Abraham ព្រោះ​កីឡាករ​រូប​នេះ​មាន​ទម្រង់​លេង​ដ៏​អស្ចារ្យ​ដូចគ្នា។ Chris Sutton បាន​និយាយ​ថា៖ “Tammy Abraham គឺ​ជា​ខ្សែប្រយុទ្ធ​លេខ 9 ដែល Chelsea បាន​សម្រេច​ចិត្ត​អនុញ្ញាត​ឲ្យ​គាត់​ចាកចេញ​ទៅ។ នោះ​ជា​រឿង​ចម្លែក​បន្តិច។ ការ​ទិញ Abraham ត្រឡប់​មក​វិញ គឺ​ជារឿង​មួយ​ដែល​ខ្ញុំ​អាច​មើល​ឃើញ​ថា នឹង​អាច​កើត​ឡើង។ គាត់​ធ្វើ​បាន​យ៉ាង​ល្អ​នៅ Roma ។ ដូច្នេះ​​ខ្ញុំ​គិត​ថា 68 លានផោន ក្នុង​ការ​ចំណាយ នឹងក្លាយ​ជា​ការ​ធ្វើ​ជំនួញ​ដ៏​ឆ្លាត​វៃ​ក្នុងការ​នាំយក Tammy Abraham ត្រឡប់​ទៅ Chelsea”។

ប្រភព: Dailypost NG