Hakimi ប្រាប់​ពី​ភាព​ងាយស្រួល ក្នុង​ការ​លេង​បាល់​ជាមួយ Lionel Messi

នៅ​ក្នុង​បទ​សម្ភាសន៍​មួយ កាល​ពី​ឆ្នាំ 2021 ខ្សែ​ការពារ​ស្តាំ​របស់​ក្លឹប​យក្ស​បារាំង Paris Saint-Germain (PSG) គឺ​កីឡាករ Achraf Hakimi បាន​បង្ហាញ​ពី​របៀប​ងាយ​ស្រួល ក្នុង​ការ​លេង​ជា​មួយ Lionel Messi ដោយ​គ្រាន់​តែ​បញ្ជូន​បាល់​ទៅ​ឲ្យ​គាត់ ហើយ​រត់ បន្ទាប់​មក​ខ្សែ​ប្រយុទ្ធ​រូប​នេះ​នឹង​បញ្ជូន​បាល់ទៅ​កន្លែង​ដែល​គេ​នៅ។

យ៉ាង​ណា​មិញ យើង​ទាំង​អស់​គ្នា​បាន​ដឹង​ហើយ​ថា ក្រោយ​ពេល​ចាកចេញ​ពី Barcelona ក្នុង​នាម​ជា​កីឡាករ​ដែល​គ្មាន​តម្លៃ​ខ្លួន Lionel Messi បាន​ចូលរួម​ជាមួយ PSG ហើយ​បាន​ចាប់​ដៃគូ​គ្នា​លេង​យ៉ាង​ល្អ​ជាមួយ Kylian Mbappe និង Neymar Jr។ កីឡាករ​អាហ្សង់ទីន​រូបនេះ​មាន​ទម្រង់​លេង​មិន​សូវ​ល្អ​ឡើយ ក្នុង​រដូវកាល​ដំបូង​របស់​គាត់​នៅ​ទឹកដី​បារាំង ដោយ​ស៊ុត​បញ្ចូលទី​បាន​តែ 11 គ្រាប់​ប៉ុណ្ណោះ ក្នុង​ការ​បង្ហាញ​ខ្លួន 34 ប្រកួត។ ប៉ុន្តែ​គាត់​ទទួល​បាន​លទ្ធផល​ល្អ​ឡើង​វិញ ក្នុង​រដូវកាល​នេះ ដោយ​នៅ​ក្នុង​ការ​ប្រកួត​ចំនួន 32 ដង Messi ស៊ុត​បញ្ចូលទី​បាន 18 គ្រាប់ និង Assists បាន​រហូត​ដល់ 17 ដង។

នៅ​ក្នុង​បទ​សម្ភាសន៍​ជាមួយ​សារព័ត៌មាន​បារាំង L’Equipe ខ្សែការពារ​ស្លាប Achraf Hakimi ​បាន​​និយាយ​​ពី​ភាព​ភ្ញាក់​ផ្អើល​របស់​ខ្លួន​ពេល​ដឹង​ថា Messi នឹង​មក​ទឹកដី​បារាំង ដោយ​គាត់​បាន​និយាយ​ថា៖ “សម្រាប់ Messi ក្នុង​ការ​ចាក​ចេញ​ពី Barcelona ខ្ញុំ​ក៏​នឹក​ស្មាន​មិន​ដល់​ដូច​​អ្នក​ដទៃ​ដែរ។ ហើយ​ពេល​ខ្ញុំ​លឺ​ថា គាត់​មក​ទី​នេះ តើ​ខ្ញុំ​អាច​និយាយ​អ្វី? វា​ជា​ក្ដី​សុបិន្ត​មួយ​របស់​ខ្ញុំ។ ខ្ញុំ​បាន​លេង​ជាមួយ​កីឡាករ​ល្អៗ​ជា​ច្រើន​នាក់ ហើយ​នៅ​តែ​ម្នាក់​គត់​គឺ Messi។ ខ្ញុំ​មាន​មោទនភាព​ក្នុង​ការ​វិវត្តន៍​ខ្លួន​ជាមួយ​កីឡាករ​បាល់ទាត់​ដ៏​ល្អ​ដូចគាត់”។

បន្ទាប់​មក Hakimi បាន​ពន្យល់​ពី​មូលហេតុ​ដែល គាត់​មិនពិបាក​ក្នុង​ការ​លេង​ជា​មួយ​នឹង​ម្ចាស់ពាន Ballon d’Or 7 សម័យកាល​រូប​នេះ​ឡើយ ដោយ​លើក​ឡើង​ថា៖ “ការ​កសាង​ទំនាក់​ទំនង​បច្ចេកទេស​ជាមួយ​គាត់ គឺ​ងាយស្រួល។ ខ្ញុំ​ឲ្យ​បាល់​ទៅគាត់ ខ្ញុំរត់ ហើយ​គាត់​នឹង​បញ្ជូន​បាល់​ទៅ​កន្លែង​ដែល​ខ្ញុំ​នៅ។ ខ្ញុំ​មាន​ការ​ភ្ញាក់ផ្អើល​ចំពោះ​របៀប​ដែល​គាត់បាន​ធ្វើ។ គាត់​គឺ​សាមញ្ញ, ស្ងប់ស្ងាត់​ណាស់”។

ប្រភព: Sportskeeda