ក្រោយ​ចាញ់ 4-1 Jurgen Klopp លើក​ឡើង​ថា បើ Man City ប្រើ​តែ​កីឡាករ 10 នាក់ ក៏​នៅ​តែ​អាច​លេង​ឈ្នះ​ក្រុម​របស់​គាត់​ដែរ

គ្រូ​បង្វឹក​របស់​ក្លឹប​ហង្សក្រហម Liverpool លោក Jurgen Klopp ជឿជាក់​ថា ក្រុម​របស់​លោក​នឹង​នៅ​តែ​មិន​អាច​យក​ឈ្នះ​ការ​ប្រកួត​ជាមួយ Manchester City ដដែល ប្រសិន​បើ​ក្នុង​ករណី​ពួក​គេ​បាត់បង់​កីឡាករ​ម្នាក់​ហើយ​នៅ​សល់​តែ 10 នាក់​នៅ​លើ​ទីលាន​ក៏​ដោយ។ គ្រូ​បង្វឹក​សញ្ជាតិ​អាឡឺម៉ង់ បាន​លើក​ឡើង​បែប​នេះ បន្ទាប់​ពី​ក្រុម​របស់​ខ្លួន​បាន​ចាញ់ Manchester City ក្នុង​ការ​ប្រកួត​ក្របខណ្ឌ Premier League ជាមួយ​នឹង​លទ្ធផល 4-1 កាល​ពី​ម្សិលមិញ​នេះ។

យ៉ាង​ណា​មិញ ហង្សក្រហម Liverpool បាន​រង​បរាជ័យ​ជា​លើក​ទី 3 ជាប់ៗ​គ្នា​នៅ​គ្រប់​ការ​ប្រកួត​ទាំង​អស់​ដែល​ពួក​គេ​បាន​លេង​តទល់​នឹង​ក្រុម​របស់​លោក Pep Guardiola។ នៅ​ក្នុង​ការ​ប្រកួត​ម្សិលមិញ​នេះ ក៏​មាន​ការ​ចម្រូង​ចម្រាស​បន្តិច​បន្តួច​ផង​ដែរ ដោយ​កីឡាករ​របស់ Liverpool បាន​លើក​ដៃ​តវ៉ា​ទៅ​អាជ្ញា​កណ្ដាល បន្ទាប់​ពី Rodri បាន​បង្ក​កំហុស​លើ Cody Gakpo ខណៈ​ដែល​កីឡាករ​សញ្ជាតិ​អេស្ប៉ាញ​រូប​នេះ បាន​ទទួល​កាត​លឿង​ម្ដង​រួច​មក​ហើយ។ យ៉ាង​ណា មន្ត្រី​អាជ្ញា​កណ្ដាល​គ្រាន់​តែ​ផ្លុំ​កញ្ចែ និង​ព្រមាន​តិច​តួច​ចំពោះ​ខ្សែបម្រើ​រូប​នេះ​ប៉ុណ្ណោះ។

បន្ទាប់​ពី​ការ​ប្រកួត​បញ្ចប់​ទៅ ក្នុង​សន្និសីទ​សារព័ត៌មាន​លោក Jurgen Klopp ត្រូវ​បាន​គេ​សួរ​អំពី​ការ​យល់ឃើញ​ពាក់ព័ន្ធ​នឹង​បញ្ហា​ដែល Rodri បង្ករ​កំហុស​លើ Cody Gakpo ដែល​ជា​កីឡាករ​របស់​គាត់។ យ៉ាង​ណា​គ្រូ​បង្វឹក​សញ្ជាតិ​អាឡឺម៉ង់​រូប​នេះ បាន​លើក​ឡើង​ថា ទោះ​បី​ជា​ពេល​នោះ Rodri ទទួល​បាន​ការ​ពិន័យ​កាត​ក្រហម ក៏​លទ្ធផល​នៃ​ការ​ប្រកួត​មិន​មាន​ភាព​ខុស​គ្នា​ដែរ។ លោក Jurgen Klopp សង្កត់​ធ្ងន់​ថា ទោះ​បី​ក្រុម​ម្ចាស់​ផ្ទះ Manchester City មាន​កីឡាករ​លេង​តែ 10 នាក់ ក៏​គាត់​គិត​ថា Liverpool នៅ​តែ​ចាញ់​ដដែល។

ប្រភព: Sportsmole