ក្លឹប​ធំៗ 3 នៅ​អង់គ្លេស កំពុង​ចាប់​ចិត្ត​លើ Alessandro Bastoni

ក្លឹប​មេឃខៀវ Manchester City, Chelsea និង Tottenham Hotspur ត្រូវ​បាន​គេ​រាយ​ការណ៍​ថា កំពុង​ចង់​ចុះ​ហត្ថលេខា​លើ​ខ្សែការពារ Alessandro Bastoni របស់ Inter Milan នៅ​ក្នុង​អំឡុង​ពេល​ទីផ្សារដោះដូរ​កីឡាករ​បើក​ឡើង​វិញ នា​រដូវ​ក្តៅ​ចុង​បញ្ចប់​រដូវកាល​នេះ។

យ៉ាង​ណា​មិញ បច្ចុប្បន្ន​កីឡាករ​វ័យ 23 ឆ្នាំ​រូបនេះ​បាន​ក្លាយ​ជា​កីឡាករ​ដ៏​សំខាន់ សម្រាប់​ក្លឹប​យក្ស​អ៊ីតាលី Inter Milan ដោយ​បង្ហាញ​ខ្លួន​សរុប 30 ប្រកួត និង​រួម​ចំណែក Assists បាន 3 ដង​នា​រដូវកាល​នេះ។ កុងត្រា​របស់ Alessandro Bastoni ជាមួយ​ក្លឹប​បច្ចុប្បន្ន​នឹង​ផុត​កំណត់​នៅ​រដូវក្ដៅ​ឆ្នាំ​ក្រោយ ហើយ​អនាគត​របស់​កីឡាករសញ្ជាតិ​អ៊ីតាលី​រូប​នេះ កំពុង​ស្ថិត​ក្នុង​ភាព​ស្រពេច​ស្រពិល។

ជា​ការ​ពិត​ណាស់ ចំពោះ​សមត្ថភាព​ដ៏​ល្អ​របស់ Bastoni ធ្វើ​ឲ្យ Inter Milan នឹង​ព្យាយាម​បន្ត​កុងត្រា​ថ្មី​ដល់​គាត់ ប៉ុន្តែ​របាយការណ៍​ថ្មីៗ​នេះ​បាន​អះអាង​ថា Bastoni ទាមទារ​តម្លើង​ប្រាក់​ខែ​ប្រហែល 5 លានអឺរ៉ូ (4.4 លានផោន) ក្នុង​មួយឆ្នាំ ទើប​គាត់​យល់​ព្រម​បន្ត​កិច្ច​ព្រមព្រៀង​កុងត្រា​ថ្មី​នៅ San Siro។ ក្លឹប Inter Milan ត្រូវ​បាន​គេ​ដឹង​ថា មិន​ទាន់​បាន​ត្រៀម​ខ្លួន​ក្នុង​ការ​ចំណាយ​ប្រាក់​ដែល​ខ្សែការពារ​រូប​នេះ​ចង់​បាន​នោះ​ឡើយ ហើយ​អាច​នាំ​ឲ្យ​គាត់​ចាកចេញ​ពី​ក្លឹប​នៅ​ចុង​បញ្ចប់​នៃ​រដូវកាល​នេះ។

យោងតាម​របាយការណ៍​ពី Calciomercato បាន​ឲ្យ​ដឹង​ថា មាន​ក្លឹប​នៅ Premier League ចំនួន 3 កំពុង​ចាប់​អារម្មណ៍​លើ Bastoni ដោយ​ក្លឹប​ទាំង​នោះ​មាន Manchester City, Chelsea និង Tottenham Hotspur។ របាយ​ការណ៍​ដដែល​នេះ​ដែរ​បាន​អះអាង​បន្ថែម​ទៀត​ថា Manchester City ដាក់​គោលដៅ​ច្បាស់​លាស់ ហើយ​ពួក​គេ​ចាត់​ទុក​កីឡាករ​សញ្ជាតិ​អ៊ីតាលី​រូប​នេះ ជា​អ្នក​ជំនួស Aymeric Laporte ដែល​អាច​នឹង​ចាកចេញ​ពី Etihad នៅ​មុន​រដូវកាល​ឆ្នាំ 2023-2024។

ប្រភព: Sportsmole