Erik ten Hag ថា កូន​ក្រុម​របស់​ខ្លួន​រូប​នេះ ជា​ខ្សែការពារ​ដ៏​​ល្អ​បំផុត​នៅ Premier League

លោក Erik ten Hag ដែល​ជា​គ្រូ​បង្វឹក​របស់​ក្លឹប​បិសាចក្រហម Manchester United បាន​ចាត់​ទុក Luke Shaw ជា​ខ្សែការពារ​ឆ្វេង​ដ៏​ល្អ​បំផុត នៅ​ក្នុង​ក្របខ័ណ្ឌ Premier League។ ខ្សែការពារ​រូប​នេះ បាន​ចំណាយ​ពេល​នៅ Old Trafford រយៈពេល 9 ឆ្នាំ​មក​ហើយ ចាប់​តាំង​ពី​ចូលរួម​ជាមួយ​បិសាចក្រហម​ដោយ​ផ្ទេរ​ពី Southampton កាល​ពី​ឆ្នាំ 2014។

ក្លឹប​បិសាចក្រហម​បាន​ចំណាយ​ប្រាក់​ចំនួន 31 លានផោន ពេល​ទិញ​គាត់​មក​ពី Southampton។ គាត់​បាន​បង្ហាញ​ខ្លួន​សរុប 249 ប្រកួត ដោយ​ស៊ុត​បញ្ចូលទី​បាន 4 គ្រាប់ និង 28 Assists។ មិន​ថា​នៅ​ក្នុង​ក្លឹប​បិសាចក្រហម រឺ​នៅ​ក្នុង​ក្រុម​ជម្រើស​ជាតិ​អង់គ្លេស Luke Shaw គឺ​ជា​ខ្សែការពារ​ឆ្វេង​ដ៏​សំខាន់​មិន​អាច​ខ្វះ​បាន និង​តែងតែ​ជា​ជម្រើស​ដំបូង​របស់​គ្រូ​បង្វឹក​ជា​និច្ច។

ខ្សែការពារ​ឆ្វេង​រូប​នេះ បានបន្ត​កុងត្រា​ថ្មី​រយៈពេល 4 ឆ្នាំ​បន្ថែម​ទៀត ជា​មួយ​ក្លឹប​បច្ចុប្បន្ន​របស់​ខ្លួន ហើយ​ស្រប​ពេល​ជា​មួយ​គ្នា​នេះ​ដែរ គ្រូ​បង្វឹកលោក Erik ten Hag បាន​សរសើរ​កីឡាករ​របស់​គាត់​យ៉ាង​ខ្លាំង។ គាត់​បាន​ប្រាប់​គេហទំព័រ​ផ្លូវការ​របស់​ក្លឹប​ថា៖ “ខ្ញុំ​គិត​ថា គ្រប់​យ៉ាង​បាន​ប្រាប់​ដល់​យើង​ហើយ, គាត់​ជា​ខ្សែ​ការពារ​ឆ្វេង​ដ៏​ល្អ​បំផុត​នៅ​​អង់គ្លេស។ អ្នក​ឃើញ​គាត់​ផង​ដែរ នៅ​ក្នុង​ក្រុម​ជម្រើស​ជាតិ​អង់គ្លេស គាត់​កំពុង​បង្ហាញ​សមត្ថភាព​បាន​យ៉ាង​ល្អ​នៅ​ទីនោះ”។

ប្រភព: Sportskeeda