Liverpool លុត​ក្រុម​បិសាចក្រហម 4-0 ខណៈ​ដែល Mohamed Salah រក​បាន​ពីរ​គ្រាប់​ម្នាក់​ឯង (មានវីដេអូ)

ក្លឹប​ហង្សក្រហម Liverpool បាន​​ឡើង​​ឈរ​​នៅ​កំពូល​តារាង Premier League បណ្ដោះ​អាសន្ន បន្ទាប់​ពី​យក​ឈ្នះ​ក្លឹប​បិសាចក្រហម Manchester United ក្នុង​លទ្ធផល 4-0 កាល​ពី​រំលង​អាធ្រាត​យប់​មិញ​នេះ។

ក្លឹប​បិសាចក្រហម​ដែល​ដឹក​នាំ​ដោយ​លោក Ralf Rangnick បាន​បង្ហាញ​ពី​ទម្រង់​លេង​ដ៏​ទន់​ខ្សោយ​មួយ​របស់​ពួក​គេ​ក្នុង​រដូវកាល​នេះ ហើយ​កំពុង​ខកខាន​ឱកាស ដើម្បី​ប្រជែងយក Top 4 ដែល​បច្ចុប្បន្ន​កំពុង​កាន់កាប់​ដោយ​ក្លឹប​មាន់ខ្នាយមាស Tottenham Hotspur និង​តាម​ប្រជែង​ដោយ Arsenal។

ដោយ​ឡែក​ការ​ប្រកួត​កាល​ពី​យប់​រំលង​អាធ្រាត​កន្លង​ទៅ​នេះ នៅ​ក្នុង​ទឹកដី Anfield ក្រុម​ម្ចាស់​ផ្ទះបាន​ស៊ុត​មួយ​គ្រាប់​នាំមុខ​មុន​តាំងពី​នាទីទី 5 តាម​រយៈ​បាល់​វាយ​បក​ដ៏​មាន​គុណភាព​របស់ Sadio Mane និង Trent Alexander-Arnold ហើយ​បញ្ជូន​បាល់​ទៅ​ឲ្យ Luis Diaz ស៊ុត​បញ្ចូល​ទី​យ៉ាង​ងាយ​ស្រួល​បំផុត។ នៅ​នាទីទី 22 ខ្សែ​ប្រយុទ្ធ​ស្លាប Mohamed Salah បាន​ដាក់​ថែម​មួយ​គ្រាប់​ទៀត ដោយ​ចប់​តង់​ទី 1 គឺ​លទ្ធផល 2-0។

ចូល​ដល់​តង់ទី​ពីរ​មក​ដល់ ក្លឹ​បហង្សក្រហម Liverpool នៅ​តែ​មាន​ការ​លេង​ប្រកប​ដោយ​គុណភាព ហើយ​អាច​រក​គ្រាប់​បាល់​បន្ថែម​ទៀត​នៅ​នាទីទី 68 ដែល​ស៊ុត​បញ្ចូល​ទី​ដោយ​ខ្សែ​ប្រយុទ្ធ​សញ្ជាតិ​សេណេហ្គាល់ Sadio Mane។

មិន​ទាន់​អស់​គ្រាប់​បាល់​នៅ​ឡើយ នៅ​នាទីទី 85 កីឡាករ Mohamed Salah បាន​ស៊ុត​មួយ​គ្រាប់​បន្ថែម​ទៀត ដែល​ជា​គ្រាប់​បាល់​ចុងក្រោយ​សម្រាប់​ការ​ប្រកួត និង​បញ្ចូល​បាល់​ពី​មិត្ត​រួម​ក្រុម Diogo Jota។

ទស្សនា​វីដេអូ​ហាយឡាយ​ការ​ប្រកួត​ខាងក្រោម

ប្រភព: 90 Min