ភ្នាក់ងារ​របស់ Amrabat កំពុង​ទាក់​ទង​ទៅ Barcelona និង​បិសាចក្រហម Manchester United

ក្លឹប Fiorentina នឹង​សម្រេច​ចិត្ត​លក់ Sofyan Amrabat ក្នុង​អំឡុង​ពេល​ទីផ្សារ​ដោះដូរ​កីឡាករ​រដូវក្តៅ​នេះ​ហើយ នេះ​បើ​យោងតាម​ភ្នាក់ងារ​របស់​ខ្សែបម្រើ​រូប​នេះ​គឺ​លោក Mohamed Sinouh បានលើក​ឡើង។ យ៉ាង​ណា​មិញ​កីឡាករ​វ័យ 26 ឆ្នាំ​រូប​នេះ គឺ​ជា​កីឡាករ​ដ៏​សំខាន់​សម្រាប់​ក្លឹប​អ៊ីតាលី​របស់​គាត់​ក្នុង​អំឡុង​យុទ្ធនាការ​ឆ្នាំ 2022-2023 ដោយ​បង្ហាញ​ខ្លួន 39 ប្រកួត ក្នុង​នោះ​មាន 25 ប្រកួត​នៅ​ក្របខ័ណ្ឌ Serie A។

កន្លង​មក​យើង​បាន​ដឹង​ហើយ​ថា Amrabat ក៏​ស្ថិត​ក្នុង​ទម្រង់​លេង​ដ៏​ល្អ​សម្រាប់​ប្រទេស​ម៉ារ៉ុក​របស់​គាត់​ផង​ដែរ ក្នុង​ព្រឹត្តិការណ៍ World Cup ឆ្នាំ 2022 ដោយ​បាន​លេង​ចំនួន 7 ប្រកួត ក្នុង​ដំណើរ​ផ្សង​ព្រេង​នៅ​ប្រទេស​កាតា និង​បាន​ជួយ​ក្រុម​ជម្រើស​ជាតិ​ឲ្យ​បាន​ឈាន​ដល់​វគ្គ​ពាក់​កណ្តាល​ផ្តាច់ព្រ័ត្រ​ជា​ប្រវត្តិសាស្ត្រ​ផង​ដែរ។

កាល​ពី​ដើម​ឆ្នាំ 2023 នេះ ទាំង​ក្លឹប Barcelona និង Manchester United សុទ្ធតែ​ត្រូវ​បាន​ផ្សារភ្ជាប់​ជា​មួយ​នឹង​ការ​ផ្ទេរ Sofyan Amrabat ប៉ុន្តែ​គ្រប់​យ៉ាង​មិន​បាន​កើត​ឡើង​ឡើយ ហើយ​គាត់​ក៏​បន្ត​ស្នាក់​នៅ​បន្ត​ជាមួយ Fiorentina រហូត​ដល់​ពេល​នេះ។ លោក Mohamed Sinouh ដែល​ជា​ភ្នាក់​ងារ​របស់​ខ្សែបម្រើ​ឆ្នើម​រូប​នេះ​បាន​និយាយ​ថា ទាំង Barcelona និង Manchester United គឺ​បរាជ័យ​ជាមួយ​នឹង​ផ្ទេរ​កាល​ពី​ដើម​ឆ្នាំ​កន្លង​ទៅ ប៉ុន្តែ Amrabat នឹង​អាចផ្ទេរ​ចេញ​នៅ​ចុង​បញ្ចប់​នៃ​រដូវកាល​នេះ។ ក្នុង​ចំណោម​ក្លឹប Barcelona និង Manchester United នឹង​មាន​ក្លឹប​មួយ​ដែល Amrabat នឹង​ចូលរួម​ជាមួយ​នៅ​រដូវក្ដៅ​ខាង​មុខ។

ប្រភព: Dailypost